Amérika xitayning üch xil toqumichiliq mehsulatigha cheklime qoydi

Amérika hökümiti xitayning üch xil toqumichiliq mehsulatini import qilishqa cheklime qoyushni qarar qilghandin kiyin, xitay hökümiti yekshenbe küni buninggha qattiq naraziliq bildürdi.

Roytirs agéntliqining xewirige qarighanda, amérikining soda ministiri karlos gutéris, amérikining xitaydin import qilinidighan paxta rexttin ishlen'gen köynek, ishtan, paxta we yaki polistirdin ishlen'gen ich kiyimlerge birdek san cheklimisi qoyulidighanliqini jakarlighan. Bu üch xil toqumichiliq mehsulatning amérika bazirigha kiridighan sani bu yil 7.5٪ Tin artuq köpeyse bolmaydiken.

Karlos gutérisning bildürüshiche, bush hökümitining ötken ayda élip barghan tekshürishige qarighanda, bu qarar amérikining toqumichiliq sana'itini saqlap qélish üchün élin'ghan.

Xitayning soda ministirliqi bu munasiwet bilen bayanat élan qilip, amérikining bu qararining dunya soda teshkilatining belgilimisige xilap ikenlikini bildürdi hemde dunya soda teshkilatining ramkisi ichide, yenimu ilgirligen halda tedbir qollinish hoquqini saqlap qalidighanliqini körsetti.

Dunya soda teshkilatining belgilimisi boyiche, eger döletlerning baziri éghir dexli- teruzgha uchrighan shara'itta, munasiwetlik tedbir qollinishigha ruxset qilinidu.

Amérikining bildürüshiche, bu yil 1 - ayda toqumichiliq mehsulatlirigha qaritilghan san cheklimisi bikar qilin'ghandin buyan, xitaydin amérika bazirigha kirgen toqumichiliq mehsulatlirining sani 1500 pirsent ashqan. (Arzu)