Chén shüybyenning amérikigha kirishi alyaska bilen cheklendi

Teywen da'irilirining charshenbe bildürushiche, latin amérikisini ziyaret qilmaqchi bolghan teywen prézidénti chén shüybyenning amérika chégrisidin kirishi alyaska bilen cheklen'gen. Teywen da'iriliri bundaq bolushida xitayning türtkisi barliqini bildürmekte.

Amérika birleshme agéntliqi, chén shüybyenning amérika hökümitidin özining paragway we kostorikagha qilidighan 5 künlük ziyaritide nyo-yorkta toxtap ötüshni hemde qaytish yolida san-fransiskoda toxtashni telep qilghanliqini melum qildi. Teywen tashqi ishlar ministiri jéymis xu'ang charshenbe bu heqte inkas qayturup, amérika hökümitining chénning amérikigha kirishini alyaska bilen cheklep qoyushigha razi bolmaydighanliqini bildürdi.

Emma u sözide yene, teywenning , ittipaqdishi amérika üchün "qiyinchliq" tughdurushnimu xalimaydighanliqini eskertti. U bu yerde, amérika hökümitining iran we shimaliy koriyining yadro programmisigha qarshi turushta xitayning yardimige érishmekchi boluwatqanliqini körsetken.

Chén shüybyenning nyo-york arqiliq amérikida toxtap ötmekchi bolghanliqidin xewer tapqan xitay hökümiti ötken hepte amérikidin chénning nyo-yorkqa kirishige yol qoymasliqni telep qilghan idi. Gerche amérikining teywen bilen resmiy munasiwiti bolmisimu, lékin washin'gton hazirghiche teywenning eng muhim ittipaqdishidur. (Peride)