Siyasiy panahliq tiligen xitay déplomati amérika dölet mejliside ispat bermekchi


2005.07.20
Share on WhatsApp
Share on WhatsApp

Awistraliyide siyasiy panahliq tiligen xitay déplomati chén yonglin washin'gton'gha kélip, amérika dölet mejlisi kishilik hoquq komitéti oyushturghan ispat bérish yighinigha qatnashmaqchi.

Amérika birleshme agéntliqining xewirige qarighanda, chén yonglin washin'gton'gha méngish aldida muxbirlargha, uning bu qétimliq sepirining asasliq meqsidi, amérika xelqighe xitay kommunistik partiyisining kishilik hoquq we falun'gonggha ziyankeshlik qilip kelgen epti-beshirisini échip bérish ikenlikini bildürgen.

37 Yashliq chén yonglin ilgiri xitay hökümitining sidniydiki konsolxanisining déplomati bolup, u bu yil 5 - ayda awstraliye hökümitidin siyasiy panahliq tiligen hemde özining falun'gongchilargha hésdashliq qilidighanliqini, shunga u xitaygha qayturiwétilse, xitay hökümiti teripidin jazalinishi mumkinlikini éytqan.

Chén yonglin yene xitay hökümitining awstraliyining her qaysi jaylirigha mingdin oshuq xitay jasoslirini orunlashturghanliqini hemde bu kishilerning nazaret qilish we falon'gongchilarni aware qilish ishlirigha mes'ul ikenlikini pash qilghan.

Xitay hökümiti chén yonglin panahliq tiligendin kéyin, uning sözlirining hemmisini yalghan dep jakarlidi. Shundaqla awstraliye hökümitining chén yonglin we uning a'ilisidikilerge awstraliyide menggülük turush wizisi bergenlikige küchlük naraziliq bildürdi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.