Chinggiz aytmatof nobél edebiyat mukapatining namzatliqigha tewsiye qilindi

Ataqliq qirghiz yazghuchisi, qirghizistanning yawropa elliride turushluq elchisi chinggiz aytmatof yéqinda ezerbeyjan yazghuchilar jemiyiti teripidin nobél edebiyatining namzatliqigha tewsiye qilin'ghan.

Bu heqte qirghizistanning "akpress" agéntliqimu uchur tarqatqan bolup, ezerbeyjan yazghuchiliri aytmatof bilen uchrishish ötküzüp, chinggiz aytmatofning türkiy xelqlerning ichidin yétiship chiqqan meshhur yazghuchi ikenlikini mu'eyyenleshtürüp, uni namzatliqqa tewsiye qilishni qarar qilghan.

"Aq kéme", "gülsare" qatarliq, 100 ligen tillargha terjime qilin'ghan meshhur eserlerning aptori chinggiz aytmatof bu yil 80 yashqa tolghan bolup, uning ijadiyitige dunya edebiyatchiliri yuqiri baha bergen idi.

Chinggiz aytmatofning nobél edebiyat mukapatining namzatliqigha tewsiye qilinishi özbékistan, qazaqistan yazghuchiliriningmu alqishigha érishken. Amérika awazining xewer qilishiche, ataqliq özbék yazghuchisi adil yaqupow "chinggiz aytmatof bu mukapatqa layiq yazghuchi, lékin u ilgiri namzat bolghan, emma uninggha bermidi " dégen bolsa, özbék sha'iri shukrullayéw uning bu mukapatqa layiq dunyawi yazghuchi ikenlikini tekitligen.

Qazaqistan yazghuchi we ziyaliylirimu oxshashla chinggiz aytmatofning bu mukapatni élishini qollaydighanliqlirini bildürüshken. Nobél edebiyat mukapati ötken yili türkiye yazghuchi orxan pamukka bérilgen bolup, u türk dunyasida tunji qétim nobél mukapati alghan erbaptur.

Bu yil Uyghur milliy herikitining rehbiri rabiye qadir yene nobél tinchliq mukapatining namzati bolghan. U, bir qanche yil mezkur mukapatqa namzat bolghan idi. Eger rabiye qadir xanim bu mukapatni alsa türk xelqliri ichide tunji qétim nobél tinchliq mukapatigha érishken kishi bolidu. Qirghizistan hökümiti 2008-yilini qirghizistandiki chinggiz aytmatof yili dep élan qilghan bolup, chinggiz aytmatof buningdin ilgiri bir qétim nobél edebiyat mukapatigha namzat bolghan bolsimu, lékin érishelmigen iken. (Ümidwar)