Amérika dölet mejlisining ikki ezasi dalay lamagha dölet mejlisi altun midali bérish qanun layihisi sundi

Amérika dölet mejlisi kéngesh palatasining ikki ezasi tibet rohani dahisi dalay lamagha dölet mejlisi altun midali bérish qanun teklip layihisi sunup, dalay lamaning tinchliqni we kishilik hoquqni ilgiri sürüsh yolida qoshqan töhpisini mukapatlashni otturigha qoydi.

Kaliforniye shtatining démokratik kéngesh palata ezasi day'anna féynshtéyn bilen wiyaming shtatining jumhuriyetchi kéngesh palata ezasi kligér tomaslar peyshenbe küni dölet mejlisige dalay lamagha amérikining aliy sherep mukapati‏ - dölet mejlisi altun médali bérish toghrisida qanun teklip layihisi sun'ghan.

Day'anna féynshtéynning bu heqtiki yazma bayanatida eskertishiche, mezkur qanun teklip layihisi hazirgha qeder73 neper kéngesh palata ezasining qollishigha érishken. Amérika qanuni boyiche mezkur qanun teklip layihisi kéngesh palatasidiki 100 neper ezaning 3 den 2 qisimi qollighanda küchke ige bolidu. Nöwette bu qanun teklip layihisi yiterlik awazning qollishigha érishken bolup, uning maqullinish mumkinchiliki bar.

Merkizi londondiki erkin tibet herikiti ishxanisi, " bu mukapat dölet mejlisi dalay lamaning töhpisini étirap qilghanliqining bishariti, buning ehmiyiti zor " dep körsetti. Dölet mejlisi ilgiri amérika qara tenlikler herikitining rehbiri doktor martin lutir kinggha bu mukapatni bergen. (Erkin)