Америка дөләт мәҗлисиниң икки әзаси далай ламаға дөләт мәҗлиси алтун мидали бериш қанун лайиһиси сунди

• 
  2006-05-12

Америка дөләт мәҗлиси кеңәш палатасиниң икки әзаси тибәт роһани даһиси далай ламаға дөләт мәҗлиси алтун мидали бериш қанун тәклип лайиһиси сунуп, далай ламаниң тинчлиқни вә кишилик һоқуқни илгири сүрүш йолида қошқан төһписини мукапатлашни оттуриға қойди.

Калифорнийә штатиниң демократик кеңәш палата әзаси дайанна фейнштейн билән виямиң штатиниң җумһурийәтчи кеңәш палата әзаси клигер томаслар пәйшәнбә күни дөләт мәҗлисигә далай ламаға америкиниң алий шәрәп мукапати‏ - дөләт мәҗлиси алтун медали бериш тоғрисида қанун тәклип лайиһиси сунған.

Дайанна фейнштейнниң бу һәқтики язма баянатида әскәртишичә, мәзкур қанун тәклип лайиһиси һазирға қәдәр73 нәпәр кеңәш палата әзасиниң қоллишиға еришкән. Америка қануни бойичә мәзкур қанун тәклип лайиһиси кеңәш палатасидики 100 нәпәр әзаниң 3 дән 2 қисими қоллиғанда күчкә игә болиду. Нөвәттә бу қанун тәклип лайиһиси йитәрлик авазниң қоллишиға еришкән болуп, униң мақуллиниш мумкинчилики бар.

Мәркизи лондондики әркин тибәт һәрикити ишханиси, " бу мукапат дөләт мәҗлиси далай ламаниң төһписини етирап қилғанлиқиниң бишарити, буниң әһмийити зор " дәп көрсәтти. Дөләт мәҗлиси илгири америка қара тәнликләр һәрикитиниң рәһбири доктор мартин лутир киңға бу мукапатни бәргән. (Әркин)