Gérmaniye bash ministiri an'géla mérkél tibetlerning rohaniy dahiysi dalay lamani qobul qildi

Gérmaniye bash ministiri an'géla mérkél 23 ‏- séntebir yekshenbe küni, xitay hökümitining küchlük naraziliqigha qarimay, tibetlerning rohaniy dahiysi dalay lama bilen körüshüp tarixiy ehmiyetke ige söhbet élip bardi.

Xitay hökümiti mérkél xanimning bu herikitige naraziliqini ipadilidi we mérkél xanimning dalay lama bilen uchrishishi bashlinishtin ilgiri gérmaniye edliye ministiri bilen élip barmaqchi bolghan söhbetni emeldin qaldurghan.

Gerche gérman terep mérkél xanimning dalay lama bilen uchrishishining bir shexsiy söhbet ikenlikini tekitligen bolsimu, emma xitay hökümiti, mezkur uchrishishni dalay lamaning tibetni musteqil qilishi pa'aliyitining bir qismi dep qarighan.

Gérmaniye dölet xadimliri bu uchrishish heqqide ichkirilep melumat bérishni ret qilghan bolsimu, emma, mushu uchrishish seweblik xitay hökümitining, gérmaniye edliye ministiri bilen xitay terep arisida miyunxénda qanun we patént heqqide élip bérilidighan söhbetni bikar qilghanliqini we gérmaniyining xitayda turushluq bash elchisini mezkur uchrishishning mahiyiti heqqide chüshendürüsh bérishke chaqirghanliqini bildürgen.

Gérmaniye hökümiti bayanatchisi tomas stegning bildürüshige qarighanda, mérkél xanimning dalay lama bilen uchrishishi, saghlam tereqqiy qiliwatqan gérmaniye -xitay munasiwetlirige tesir körsetmeydiken.

B b s radiyo ‏- téléwiziye shirkitide bu heqte bérilgen xewerning , gérmaniyide hepte axirida chiqidighan su'eddu'etsche ze'itung gézitidin neqil élip körsitishiche, dalay lama özining tibetning musteqilliqini emes belki , tibetke aliy aptonomiye telep qilidighanliqini bildürgen we xitayning mezkur naraziliq qilmishlirini " siyasiy tekebburluq" dep atighan.

Dalay lama yene " men negila barmay, xitay qarshiliq bildüridu. Xitaylar özining qeyergiche baralaydighanliqini sinawatidu" dégen. (Jüme)