Хитай суданға иқтисадий җаза йолға қоймаслиқ тоғрисида агаһландурди


2007.06.16

Хитайниң дарфур мәсилисидики алаһидә вәкили лию гүйҗин суданға қарита иқтисадий җаза йолға қоймаслиқ тоғрисида агаһландурди.

Бу айниң башлирида бейҗиң һөкүмити тәрипидин хитайниң дарфур мәсилисидики алаһидә вәкили тәйинләнгән лию, җүмә күни бәргән баянатида, " дарфурда вәзийәт мурәккәп. Хәлқара җамаәт соданға қарита иқтисадий җаза йолға қоюш орниға хәлқниң турмушини яхшилашни ойлишиши керәк " деди.

Сәйшәнбә күни содан һөкүмити хәлқара җамаәтниң бесими билән дарфурға африқа иттипақи вә б д т бирләшмә тинчлиқни қоғдаш күчи орунлаштурулушини мақуллиған иди.

Хитай һөкүмити судан билән йеқин иқтисадий вә сиясий мунасивәткә игә бир дөләт һесаблиниду. Ғәрб дөләтлири вә хәлқара кишилик һоқуқ тәшкилатлири хитай һөкүмитини, дафурдики қирғинчилиқни тохтитиш үчүн судан һөкүмитигә йетәрлик бесим ишләтмәйватиду дәп, әйиблимәктә.

Хитай һөкүмити судан нефитиниң әң чоң херидари болуп судан, нефитниң үчтә иккилик қисимини хитайға експорт қилиду. Хитай болса суданниң әң чоң қорал-ярақ импорт мәнбәси һесаблиниду. Хитай һөкүмити судан билән болған йеқин иқтисадий вә һәрбий мунасивәтлири түпәйлидин өтмүштә, б д т ниң дафурдики қирғинчилиқни тохтитиш үчүн суданға тинчлиқ қоғдаш қисимлири әвәтишигә қарши чиққан иди.

Лекин хитай һөкүмитиниң алаһидә вәкили лию, бесим һечқандақ ишни һәл қилмайду. Судан һөкүмитиниң һәмкарлиқини қолға кәлтүрмәй туруп, дарфур мәсилсини бир тәрәп қилиш мумкин әмәс, дегән. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.