Darfur mesilisi muhakimiside emeliy ilgirilesh bolmidi

Parizhda ötküzülgen sudan darfur krizisi xelq'ara muhakimisi düshenbe küni ayaqlashti.

Yighin'gha birleshken döletler teshkilati, amérika, xitay hemde yawrupa ittipaqi, erep birleshme xelipiliki qatarliq 11 dölet hemde xelq'araliq teshkilat yuqiri derijilik emeldarliri qatnashti. Emma sudan hemde afriqa ittipaqi wekil ewetmigen.

Amérika awazi radi'osining xewiridin melum bolushiche, gerche darfur mesilisi heqqidiki muhakimige qatnashqan terepler darfurning siyasiy jehettiki ilgirilishi, insanperwerlik, tinchliq weziyiti we darfurning qayta qurulushi mesililiri üstide muhakime élip bérip, xelq'araliq qoghdashni dawamlashturushni qollighan bolsimu, emma sudanning darfurdiki zorawanliqini toxtitishida konkrét bir siyasiy tedbir élish mesilide ilgirilesh bolmighan.

Nyuyork waqti gézitining xewiride tekitlinishiche, xitay sudan hökümitini aktip qollap, darfur mesiliside birleshken döletlerning xelq'ara tinchliqni qoghdash qismini kirgüzüshke qarshi turup kelgen, xitayning herikiti xelq'arada " xitay milliy qirghinchiliq siyasitini qollidi " dep eyibleshke uchrap kelmekte.

Bu heqtiki melumatlarda yene, darfur krizisi yüz bériwatqan bügünki kündimu, xitayning sudan hökümitini siyasiy jehette qollash bilen teng, yene uninggha herbiy we iqtisadi jehette dawamliq yardem bériwatqanliqi qattiq tenqidke uchrimaqta. (Gülchéhre)