ئامېرىكا دۆلەت مەجلىسى دارفۇر مەسىلىسىنى بېيجىڭ ئولىمپىك يىغىنىغا باغلايدىغان قارار لاھىيىسى ماقۇللىدى


2007.06.08
Share on WhatsApp
Share on WhatsApp

دۆلەت مەجلىسى ئالدىنقى كۈنى دارفۇر مەسىلىسىنى بېيجىڭ ئولىمپىك يىغىنىغا باغلايدىغان قارار لاھىيىسى ماقۇللاپ، خىتاي دائىرىلىرىنى دارفۇر مەسىلىسىدە ئولىمپىك مۇسابىقىسىنىڭ ئىنسانپەرۋەرلىك روھىغا مۇناسىپ ھەرىكەت قىلىشقا چاقىردى.

دۆلەت مەجلىسىنىڭ قارار لاھىيىسىدە، ئامېرىكىدىكى بەزى سىياسەتچى ۋە پائالىيەتچىلەرنىڭ ‏2008‏- يىلى بېيجىڭدا ئۆتكۈزۈلىدىغان ئولىمپىك مۇسابىقىسىنى بايقۇت قىلىش ھەققىدىكى چاقىرىقى يەر ئالمىغان بولسىمۇ، لېكىن قارار لاھىيىسىدە " خىتاي دارفۇر، سۇدان ۋە دۇنيانىڭ باشقا جايلىرىدا ئولىمپىك مۇسابىقىسىنىڭ ئىنسان قەدىر - قىممىتىنى ئۇلۇغلاش روھىغا ئىزچىل تۈردە ئەمەل قىلىشى كېرەك،" دەپ ئاگاھلاندۇردى. دارفۇر مەسىلىسىنى بېيجىڭ ئولىمپىك مۇسابىقىسىغا باغلايدىغان قارار لاھىيىسى ماقۇللاش خىتاي دائىرىلىرىنىڭ جېنىغا تەگدى.

خىتاي تاشقىي ئىشلار مىنىستىرلىكى پەيشەنبە كۈنى ئېلان قىلغان بۇ ھەقتىكى باياناتىدا قارار لاھىيىسىنى " جۇڭگونىڭ دارفۇر مەسىلىسىدىكى ئىجابىي تىرىشچانلىقىنى نەزەرگە ئالماي، جۇڭگونى سەۋەبسىز ھالدا تەنقىد قىلغان شۇنداقلا دارفۇر مەسىلىسىنى بېيجىڭ ئولىمپىك مۇسابىقىسى بىلەن باغلىماقچى بولغان. بۇ جۇڭگونىڭ ئىچكى ئىشلىرىغا قوپاللىق بىلەن ئارلاشقانلىقتۇر، " دەپ ئەيىپلىدى.

سۇداندا يەرلىك قەبىلىلەر بىلەن خارتۇم ھۆكۈمىتى ئارىسىدا پارتلىغان توقۇنۇشتا 2003‏- يىلى 2‏- ئايدىن ھازىرغىچە 200 مىڭدىن ئارتۇق ئادەم ئۆلگەن، 2 يېرىم مىليون ئىنسان ماكانلىرىدىن ئايرىلغان ئىدى. خىتاي سۇدان بىلەن بولغان ئىقتىسادىي ۋە نېفىت سودىسى تۈپەيلىدىن ب د ت خەۋپسىزلىك كېڭىشىدە ئامېرىكا ۋە غەرب دۆلەتلىرىنىڭ دارفۇرغا خەلقئارا قىسىملارنى ئەۋەتىش ھەم سۇدانغا ئىمبارگو قۇيۇش تەكلىپىنى رەت قىلىپ كەلمەكتە ئىدى. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.