Amérika béyjingni xongkongda démokratiyini kéngeytishke chaqirdi

Bush hökümiti we amérika dölet mejlisi béyjing da'irilirini xongkongda dimukratiyeni kéngeytishke chaqirdi. Amérika tashqi ishlar ministirlikining yardemchi tashqi ishlar ministiri shléyfir yéqinda amérika dölet mejlisidiki guwaliq bérish yighinida söz qilip, xitay hökümitini xongkong xelqining arzusigha hörmet qilip, xongkongda heqiqi dimukratik hökümet qurulushini asanlashturushqa chaqirdi.

Shléyfir mundaq deydu : biz xongkong xelqining muweppeqiyet qazinishini ümid qilimiz. Biz ghalibiyetning achquchi xongkongning dimukratiye yolida dawamliq ilgirlep, omumi saylam élip bérish nishanigha yétish dep qaraymiz, xongkongning kélechigi xongkong xelqining qolida. Amérika awam palata ezasi réj, xongkongdiki dimukratik islahat musapisige qarshi chiqishning choylida toxtughidek bir sewebi yoqlighini ilgiri sürgen.

Xongkongdiki dimukratik küchler, 2007 we 2008 - yilliri xongkongda omumi xelq saylami élip bérishni telep qilmaqta. Biraq béyjing da'iriliri xongkongdiki omumi xelq saylimining ichkiridiki ölkilerge tesir körsitishidin ensirep, dimukratik küchlerning yuqarqi telipige qarshi chiqqan. Bu yil 4 - ayda xitay merkizi hökümiti 2007 we 2008 - yilliri xongkongda omumi xelq saylimi élip bérilmaydighanliqini jakalighan idi. Bush hökümiti we amérika dölet mejlisining xongkong mesilisidiki meydani xitay tashqi ishlar ministirlikining tenqitige uchridi. Xitay tashqi ishlar ministirlikining bayanatchisi réj we shléyfirlarni tenqitlep, ularning herkiti xongkongning ichki ishlirigha arlashqanliqdur dep eyipligen. (Erkin)