Hélari bilen obama xitay tawarliridin baj élish qanun teklip layihisini qollash sépige qétildi


2007.07.09

Amérika démokratlar partiyisining prézidént namzatliri ichide aldinqi rettiki kandidatlardin kéngesh palata ezasi hélari klinton bilen barak obama, kéngesh palatasining 4 neper ezasi teripidin otturigha qoyulghan xitay malliridin tamozhna béji élish heqqidiki qanun teklip layihisini qollaydighanlar sépige qétildi.

Roytérs axbarat agéntliqining xewer qilishiche, amérika dölet mejlisidiki emeldarlar hélari klinton bilen barak obamaning ötken hepte mezkur qanun teklip layihisige imza qoyghanliqini bildürgen. Bu qanun teklip layihiside, eger xitay xelq pulining qimmitini östürüp, xitay - amérika arisidiki soda tengpungsizliqini özgertishke küchimise, xitay tawarlirigha tamozhna béji qoyush otturigha qoyulghan. Gerche mezkur qanun teklip layihiside xitayning ismi tilgha élinmighan bolsimu, lékin bu qanunning tigh uchi xitaygha qaritilghanliqi shübhisiz.

Washin'gtondiki közetküchiler, démokratlar partiyisidin bolghan eng küchlük 2 prézidént namzatining bu qanun layihisini qollighanliqi, kéler nöwetlik prézidént saylimida xitay - amérika soda munasiwiti eng talash - tartish qozghaydighan qiziq témilardin bolup qalidighanliqini bildürmekte.

Amérika dölet mejlisidiki bezi ezalar, béyjing hökümitining xitay puli qimmitini% 40 erzan tutup, éksport mehsulatlirigha adaletsiz riqabet muhiti yaritiwatqanliqini we bu xitay - amérika sodisida amérikining soda qizil reqimi 200 milyard dollardin éship kétishige sewebchi boluwatqanliqidin narazi boluwatatti. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.