Роберт зойлик: хитайда бир партийә диктаторлиқи узунға бармайду

Америкиниң муавин ташқи ишлар министири роберт зойлик чаршәнбә күни хитай - америка мунасивәтләр комитетида сөз қилип, хитайни демократийә йолида меңишқа чақирдиған һәмдә нөвәттики бир партийә диктаторлуқ түзүминиң узун - муддәткичә давамлашмайдиғанлиқини тәкитлигән.

Зойлик, хитай - америка мунасивәтлиридики иҗабий вә сәлбий амилларни тилға елиш билән биргә, хитай даирилирини сиясий түзүлмә ислаһати елип берип, демократийигә көчүшкә чақирди. У, " сиясий түзүлмидики бекинмичилик хитай җәмийитиниң мәңгүлүк алаһидилики болалмайду, һәттә буни узунғичә давамлаштурғили болмайду" дәйду. Зойликниң тәкитлишичә, хитайда сияси өзгириш елип берип, даириләрниң хәлқ алдидики мәсулийәт вә мәҗбурийитини ада қилиши керәк икән.

Зойлик сөзидә йәнә, "хитай компартийисиниң һөкүмранлиқи, мәмликәт ичидики һәр хил риқабәтләрни тоғра бир тәрәп қилалмайватиду" деди. У, иқтисади тәрәққият вә милләтчиликни күчәйтип, һөкүмранлиқини мустәһкәмләшкә ишинидиған компартийә рәһбәрлириниң "хәтәргә тәвәккүл қилиш вә хаталиқ өткүзүш" басқучида кетиватқанлиқини агаһландурди.

Хитай - америка мунасивәтлирини дунядики әң мурәккәп мунасивәт дәп тәриплигән зойлик, "әгәр америкиниң хитай билән болған сода қизил рәқими азайтилмиса, америка хитайға имбарго қоюшни ойлишиду" дәп көрсәтти. Бу юқири дәриҗилик бир америка әмәлдариниң хитай - америка мунасивәтлири тоғрисида тунҗи қетим ибариси еғир сөзләрни қоллинишидур. (Пәридә)