ۋاتىكان ، خىتاي دائىرىلىرىنى كاتولىكلارغا زىيانكەشلىك قىلىش بىلەن ئەيىبلىدى

رىم ۋاتىكانى شەنبە كۈنى بايانات ئېلان قىلىپ ، خىتاي ھۆكۈمىتىنىڭ كاتولىك دىنىدىكى زاتلارنى مەملىكەت بويىچە چەكلىگەنلىكى، كىشىلىك ھوقۇققا قىلىنغان ئېغىر دەرىجىدىكى بۇزغۇنچىلىق دەپ كۆرسەتتى.

فرانسىيە ئاخبارات ئاگېنتلىقى نەقىل كەلتۈرگەن ۋاتىكان باياناتچىسىنىڭ سۆزىدە ، ۋاتىكاننىڭ بۇ يىل 8 - ئايلاردا خىتايدىكى كاتولىك ئېپىسكوپلار ۋە كاتولىك مۇخلىسلارنى قولغا ئېلىش ۋەقەسىدىن خەۋەر تاپقانلىقىنى ئەسكەرتىپ ، ئەگەر بۇ توغرا بولغان تەقدىردە ۋاتىكان دىنىي ئېتىقاد ھوقۇقىغا ئېغىر دەرىجىدە بۇزغۇنچىلىق قىلىش ۋەقەسىگە دۇچ كەلمەكتە دېگەنلىكتۇر ، دىنىي ئېتىقاد ھوقۇقىمۇ ئاساسى كىشىلىك ھوقۇقنىڭ بىر قىسىمى دەپ تەكىتلىگەن . ۋاتىكان ، خىتاي ھۆكۈمىتىدىن قولغا ئېلىنغان كاتولىك ئېپىسكوپلار ۋە كاتولىك مۇخلىسلارنى دەرھال قويۇۋېتىشنى تەلەپ قىلىپ ، كاتولىك مۇخلىسلارنىڭ دىنىي ئىبادەت پائالىيىتى بىلەن شۇغۇللىنىشىغا يول قويۇشنى تەلەپ قىلغان .

ۋاتىكان باياناتچىسى جاۋكيۇن ناۋارو- ۋالسنىڭ بىلدۈرۈشىچە ، خىتاي جامائەت خەۋپسىزلىك دائىرىلىرى بۇ يىل 8 - ئايدا خېبېينىڭ باۋدىڭ رايونىدا 10 نەپەر كاتولىكنى قولغا ئېلىپ ، ئۇلارنىڭ ئىككىسىنى ئەمگەك بىلەن ئۆزگەرتىش لاگېرىغا يوللىغان . 9 - ئاينىڭ باشلىرىدا 23 نەپەر كاتولىك مۇرىتى تۇتقۇنغا ئۇچرىغان . ۋاتىكان باياناتچىسى فۇجوۋدىمۇ كاتولىكلارنى قولغا ئېلىنغانلىقىنى ئىلگىرى سۈرمەكتە . خىتاينىڭ ۋاتىكان بىلەن بولغان دىپلوماتىك مۇناسىۋىتى 1951 - يىلى ئۈزۈلگەن ئىدى . ئەينى چاغدا خىتاي ھۆكۈمىتى ۋاتىكاننىڭ خىتايدىكى كاتولىك چېركاۋلارغا ئېپىسكوپ تەيىنلىشىنى رەت قىلغان ئىدى . بۇ مەسىلە ۋاتىكان بىلەن خىتاينىڭ دىپلوماتىك مۇناسىۋەت ئورنىتىشىغا ھازىرمۇ توسالغۇ بولماقتا . (ئەركىن)