Ватикан , хитай даирилирини католикларға зиянкәшлик қилиш билән әйиблиди

Рим ватикани шәнбә күни баянат елан қилип , хитай һөкүмитиниң католик динидики затларни мәмликәт бойичә чәклигәнлики, кишилик һоқуққа қилинған еғир дәриҗидики бузғунчилиқ дәп көрсәтти.

Франсийә ахбарат агентлиқи нәқил кәлтүргән ватикан баянатчисиниң сөзидә , ватиканниң бу йил 8 - айларда хитайдики католик епископлар вә католик мухлисларни қолға елиш вәқәсидин хәвәр тапқанлиқини әскәртип , әгәр бу тоғра болған тәқдирдә ватикан диний етиқад һоқуқиға еғир дәриҗидә бузғунчилиқ қилиш вәқәсигә дуч кәлмәктә дегәнликтур , диний етиқад һоқуқиму асаси кишилик һоқуқниң бир қисими дәп тәкитлигән . Ватикан , хитай һөкүмитидин қолға елинған католик епископлар вә католик мухлисларни дәрһал қоюветишни тәләп қилип , католик мухлисларниң диний ибадәт паалийити билән шуғуллинишиға йол қоюшни тәләп қилған .

Ватикан баянатчиси җавкюн наваро- валсниң билдүрүшичә , хитай җамаәт хәвпсизлик даирилири бу йил 8 - айда хебейниң бавдиң районида 10 нәпәр католикни қолға елип , уларниң иккисини әмгәк билән өзгәртиш лагериға йоллиған . 9 - Айниң башлирида 23 нәпәр католик мурити тутқунға учриған . Ватикан баянатчиси фуҗовдиму католикларни қолға елинғанлиқини илгири сүрмәктә . Хитайниң ватикан билән болған дипломатик мунасивити 1951 - йили үзүлгән иди . Әйни чағда хитай һөкүмити ватиканниң хитайдики католик черкавларға епископ тәйинлишини рәт қилған иди . Бу мәсилә ватикан билән хитайниң дипломатик мунасивәт орнитишиға һазирму тосалғу болмақта . (Әркин)