Amérika xelq'ara diniy erkinlik komitéti bushni béyjing olimpik yighinida xitay türmisidiki mehbuslar bilen körüshüshke chaqirdi

Amérika diniy erkinlik komitéti peyshenbe küni bayanat élan qilip, eger prézidént bush béyjing olimpik musabiqisining échilish murasimigha qatnashsa, bu jeryanda diniy erkinlik we kishilik hoquqi üchün qolgha élin'ghan xitay türmisidiki mehbuslar bilen körüshüsh we yer asti xristyan chérkawlirining diniy murasimigha qatnishishini telep qildi.

Bayanatta mundaq deydu, " biz prézidéntning béyjing sepiride diniy erkinlik dégenlik peqet ibadet bilen cheklinish, dégenlik emeslikini, bu yene shexslerning söz, yighilish we ipade erkinlikidin behriman bolush dégenlik ikenlikini shundaqla puqralarning diniy rehberlirini saylash, perzentlirini öz diniy étiqadi buyiche terbiyileshni öz ichige alidighanliqini resmiy we xususiy sorunlarda ashkara otturigha qoyushini telep qilimiz ."

Amérika xelq'ara diniy erkinlik komitétining re'isi maykél kromarté, bushning béyjingdiki mezgilide yer asti xristyan chérkawlirini ziyaret qilishini, tibetlerning 2 ‏- rohani rehbiri goédén choéké nyima bilen körüshüshini telep qilip, "prézidéntni yenek, türmidiki katolik bishoplarni, yer asti xristyan rehberlirini, tibetlik buddistlar we musulman Uyghurlarni derhal we shertsiz qoyuwétishni telep qilishqa chaqirimiz " dédi.

Xitay dölet re'isi xu jintaw 2007 - yili yazda awstraliyide chaqirilghan asiya - tinch okyan döletlirining bashliqlar yighinida prézidént bushni béyjing olimpik yighinigha teklip qilghan, bush xu jintawning teklipini qobul qilghan idi. Xitay 1999 ‏- yildin béri amérika tashqi ishlar ministirliqining diniy erkinlik weziyiti "alahide diqqet qilinidighan döletler" tizimlikidin orun élip kelmekte. (Erkin)