Америка хитайниң кишилик һоқуқ хатирисидики мәйданида чиң турди


2005.03.02

Хитай һөкүмити америка ташқи ишлар министирлиқиниң кишилик һоқуқ доклатини әйиплигәндин кейин, америка ташқи ишлар министирлиқи сәйшәнбә күни америкиниң хитайниң кишилик һоқуқ хатирисигә бәргән баһасида давамлиқ чиң туридиғанлиқини билдүрди.

Америка ташқи ишлар министирлиқиниң муавин баянатчиси адам ирәли (Adam Ereli) мухбирларни күтивелиш йиғинида, америкиниң кишилик һоқуқ мәсилисидики мәйданиниң өзгәрмәйдиғанлиқини тәкитлиди.

У йәнә, америкиниң хитайниң кишилик һоқуқ хатирисигә көңүл бөлидиғанлиқини, шундақла кишилик һоқуқ диалогиниң америка-хитай мунасивәтлирини бир тәрәп қилишта муһим рол ойнайдиғанлиқини билдүрди.

Америка ташқи ишлар министирлиқи дүшәнбә күни елан қилған йиллиқ кишилик һоқуқ доклатида, хитайниң кишилик һоқуқ хатирисини әйибләп, хитайниң 2004 - йилидики кишилик һоқуқ хатирисиниң кишини әпсусландуридиғанлиқини көрсәткән иди.

Буниңға қарита америкида паалийәт елип бериватқан америка уйғурлири бирләшмисиму инкас қайтуруп, америка ташқи ишлар министирлиқиниң, мәзкур доклатта хитайниң уйғур елидә елип бериватқан кишилик һоқуқ дәпсәндичиликлирини паш қилғанлиқини қарши алди.

Америка уйғур бирләшмисиниң рәиси нури түркәл, мәзкур доклатниң хитайға бесим болуп, униң хәлқаралиқ кишилик һоқуқ өлчимигә йетишигә түрткә болушини үмид қилидиғанлиқини билдүрди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.