Amérika dölet mudapi'e ministirliqi xitayning herbiy küchi heqqidiki yilliq doklatini élan qildi


2005.07.20
Share on WhatsApp
Share on WhatsApp

Amérika dölet mudapi'e ministirliqi seyshenbe küni xitayning herbiy küchi heqqidiki yilliq doklatini élan qilip, xitayning téz sür'ette éshiwatqan herbiy tereqqiyati we asiya-tinch okyan rayonidiki herbiy kéngeymichilikining teywen'ge tehdit bolupla qalmastin, amérika we bashqa döletlergimu tehdit bolidighanliqini bildürdi.

45 Betlik mezkur doklatta yene, xitay armiyisining qisqa muddetlik nishanining teywen bilen toqunushup qélish éhtimalliqigha teyyarliq körüsh bolsa, uzun mezgildin qarighanda xitay iqtisadining tereqqiyati we chet'eldin üzlüksiz qoral sétiwélish netijiside, xitayning herbiy zamaniwilishishi, amérikini öz ichige alghan bashqa döletlergimu tehdit bolidighanliqi körsitilgen.

Pentagon yeni amérika dölet mudapi'e ministirliqining asiya ishliri mutexessisi kért kembélning amérika birleshme agéntliqigha bildürüshiche, bu qétimliq doklatning ségnal bérish xaraktéri ilgiriki yillardikige sélishturghanda bir qeder küchlük bolghan.

Doklatta yene, xitayning bashqurilidighan bomba séstimisimu analiz qilinip, xitayning teywen'ge toghrilap qoyghan neche yüz bashqurilidighan bombiliridin sirt yene, qit'e ara uchudighan hetta amérikighimu yételeydighan bashqurilidighan bombilirigha ige ikenligi eskertilgen.

Amérika dölet mudapi'e ministiri donald ramzféld seyshenbe küni bu doklatning yawropa ittipaqining xitaygha qaratqan qoral cheklimisini bikar qilmasliqigha seweb bolalaydighanliqini bildürdi.

Xitay da'iriliri charshenbe küni bu doklatqa qarshi chiqip, xitayning tinch yolda tereqqiy qiliwatqanliqini hemde bashqa döletlerge tehdit bolmaydighanliqini bildürdi. Xitay tashqi ishlar ministiri li jawshing bu heqte, "xitay héchqandaq birsige tehdit bolmayla qalmastin, hetta biz herqaysi dölet xelqliri bilen dost bolushni xalaymiz" dep bildürgen. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.