Xitay, dunyadiki axbarat erkinliki eng nachar döletler tizimlikige kirgüzüldi

Xelq'ara chégrisiz muxbirlar teshkilati 23 ‏- öktebir küni xelq'ara metbu'at erkinliki mesilisi heqqide yene bir qétim doklat élan qildi. Mezkur teshkilat élan qilghan bu 2006 ‏- yilliq doklatta, "xitay , dunyadiki 168 dölet arisida, metbu'at erkinlikini basturup kéliwatqan eng nachar döletlerning biri" dep körsitilgen.

Xelq'ara chégrisiz muxbirlar teshkilati élan qilghan bu yilliq doklatta körsitilishiche, metbu'at erkinliki jehette eng nachar bolghan döletler arisida birinchi orunda turidighini shimaliy koriye iken, uningdin qalsa türkmenistan, éritriye, kuba, la'os, xitay , éran we se'udi erebistan qatarliq döletler iken . Xitay , axbarat erkinliki eng nachar bolghan 10 dölet arisida, altinchi orunni igiligen.

Xelq'ara chégrisiz muxbirlar teshkilatining asiya bölümi bashliqi winsént brosél ( Vincent Brosel) ning melum qilishiche, xitay, axbarat erkinlik mesiliside, her yili dégidek dunyaning eng arqida qilip kelgen . Bu yil bolsa 2005 ‏- yilidikidinmu , téximu keynige chékinip ketken.

Winsént brosél( Vincent Brosel) sözide" bundaq bolushidiki seweb, bu yil xitayda bir neper muxbir saqchilar teripidin urup öltürüldi hemde xitay hökümitining muxbirlarni nazaret qilish we basturush qatarliq qilmishliri yenila ilgiriki yillardikige oxshash bolup, izchil dawamlashti. Hazirning özide az dégende 32 neper muxbir xitay türmiside yatmaqta. Buningdin bashqa yene intérnét tor betliride namsiz maqale élan qilghan 50 tin artuq kishimu zindan'gha tashlandi " dédi.

Xelq'ara chégrisiz muxbirlar teshkilati 2006 ‏- yilliq doklatida, xitayni öz ichige alghan metbu'at erkinliki yoq diyerlik bolghan bu dölet rehberlirini xataliqni boynigha élip, metbu'atqa bolghan basturushini derhal toxtitishqa ündigen. . (Méhriban)