Xitay amérikining diniy erkinlik doklatini "asassiz" dep ret qildi

Amérikining diniy erkinlik doklatida Uyghurlarning diniy erkinlik hoquqigha dexli - teruz yetküzmekte, dep eyiblen'gen béyjing hökümiti, amérika tashqiy ishlar ministirliqining mezkur doklatini " asassiz" we junggoning ichki ishlirigha arilashqanliq, dep ret qildi.

Amérika tashqiy ishlar ministirliqi ötken jüme küni élan qilghan doklatta, "xitay da'iriliri térrorchiliqqa qarshi turushtin paydilinip, Uyghur musulmanlirini basturush herikitini üzlüksiz dawamlashturmaqta " dep tekitligen idi.

Doklatta eskertishiche, étnik jehette xitaylargha tewe bolghan tungganlar Uyghurlargha qarighanda téximu keng diniy erkinliktin behriman bolmaqtiken. Xitay tashqiy ishlarministirliqi bayanatchisi chin gang, amérika tashqiy ishlar ministirliqining doklatini " junggoning diniy we az sanliq milletler siyasitige qaritilghan asassiz tenqidlerning dawami " dep eyiblidi. U," junggoda barliq milletler we her qaysi dinlargha ishinidighan kishiler qanun boyiche diniy étiqad erkinlikidin behriman bolmaqta "deydu.

Amérika tashqiy ishlar ministirliqi doklatta, xitay da'irilirining musteqilliq üchün tinch yollar bilen pa'aliyet élip bériwatqanlar we atalmish qanunsiz diniy pa'aliyetlerge qatnashqanlarni térrorluq pa'aliyetlerge qatnashqanlar bilen bir dep qarap, ulargha oxshash mu'amile qiliwatqanliqini eyibligen. (Erkin)