Рамисфилд хитай рәһбәрлири билән учрашти


2005.10.19

Хитайни зиярәт қиливатқан америка дөләт мудапиә минситири доналд рамисфилд чаршәнбә күни хитай дөләт рәиси хуҗинтав, дөләт мудапиә министири савгуаңчүән билән учрашти һәмдә хитайниң мәркизий компартийә мәктипидә демократийә вә сөз әркинлики һәққидә нутуқ сөзлиди.

У хитайниң тинчлиқ билән гүллинишини қарши алидиғанлиқини билдүрүп, америка - хитай мунасивитиниң һәм мурәккәп, һәм риқабәтлик икәнликини көрсәтти.

У шундақла хитайниң һәрбий қурулуш сиясәтлириниң очуқ- йоруқ әмәсликини тәнқид қилип, мудапиә чиқимлирини йошурушниң , башқа әлләрдә хитайниң ғәризи һәққидә гуманларни пәйда қилидиғанлиқини тәкитлиди. Чүштин кийинки учришишта, доналд рамисфилд билән савгуаңчүән икки дөләтниң һәрбий алақисини күчәйтиш һәққидә сөһбәт өткүзди. Сав гуаңчүән хитайниң дөләт мудапиә чиқимлирини аз елан қилғанлиқини инкар қилди. У хитайниң мудапиә чиқимлириниң америка ейтқандәк 90 милярд доллар болмастин, бәлки 30 милярд долларлар әтрапида икәнликини билдүрди.

Америка дөләт мудапиә министири доналд рамисфилд чаршәнбә күни йәнә иккинчи топчи қисимлар қоманданлиқ мәркизи йәни хитайниң истиратегийилик башқурулидиған бомба қисимлири қоманданлиқ мәркизини зиярәт қилди. У 1966 - йилидин бери, бу йәрни зиярәт қилған түнҗи чәтәллик. Рамисфилдниң йенидикиләрниң ашкарилишичә, бу зиярәт хитайниң һәрбий тәрәққияти һәққидә рамисфилдни қиммәтлик учурларға игә қилған.

Буниң алдида, доналд рамисфилд хитайниң шәрқий җәнубий асия алий йиғинидин америкини сиқип чиқиришқа вә шаңхәй һәмкарлиқ тәшкилати арқилиқ америкиниң өзбекистандики һәрбий мәвҗүтлиқини йоқитишқа урунғанлиқидин нарази болғанлиқини билдүрүп, хитайни "қош бислиқ сигнал" бәрмәсликкә чақирған иди. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.