Ramisfild xitay rehberliri bilen uchrashti

Xitayni ziyaret qiliwatqan amérika dölet mudapi'e minsitiri donald ramisfild charshenbe küni xitay dölet re'isi xujintaw, dölet mudapi'e ministiri sawgu'angchü'en bilen uchrashti hemde xitayning merkiziy kompartiye mektipide démokratiye we söz erkinliki heqqide nutuq sözlidi.

U xitayning tinchliq bilen güllinishini qarshi alidighanliqini bildürüp, amérika - xitay munasiwitining hem murekkep, hem riqabetlik ikenlikini körsetti.

U shundaqla xitayning herbiy qurulush siyasetlirining ochuq- yoruq emeslikini tenqid qilip, mudapi'e chiqimlirini yoshurushning , bashqa ellerde xitayning gherizi heqqide gumanlarni peyda qilidighanliqini tekitlidi. Chüshtin kiyinki uchrishishta, donald ramisfild bilen sawgu'angchü'en ikki döletning herbiy alaqisini kücheytish heqqide söhbet ötküzdi. Saw gu'angchü'en xitayning dölet mudapi'e chiqimlirini az élan qilghanliqini inkar qildi. U xitayning mudapi'e chiqimlirining amérika éytqandek 90 milyard dollar bolmastin, belki 30 milyard dollarlar etrapida ikenlikini bildürdi.

Amérika dölet mudapi'e ministiri donald ramisfild charshenbe küni yene ikkinchi topchi qisimlar qomandanliq merkizi yeni xitayning istiratégiyilik bashqurulidighan bomba qisimliri qomandanliq merkizini ziyaret qildi. U 1966 - yilidin béri, bu yerni ziyaret qilghan tünji chet'ellik. Ramisfildning yénidikilerning ashkarilishiche, bu ziyaret xitayning herbiy tereqqiyati heqqide ramisfildni qimmetlik uchurlargha ige qilghan.

Buning aldida, donald ramisfild xitayning sherqiy jenubiy asiya aliy yighinidin amérikini siqip chiqirishqa we shangxey hemkarliq teshkilati arqiliq amérikining özbékistandiki herbiy mewjütliqini yoqitishqa urun'ghanliqidin narazi bolghanliqini bildürüp, xitayni "qosh bisliq signal" bermeslikke chaqirghan idi. (Arzu)