Дуня банкиси хитайға беридиған ярдәм пулини тохтатмайдиғанлиқини билдүрди

Дуня банкисиниң башлиқи паол волфуветис, гәрчә хитайниң иқтисади тиз тәрәққий қиливатқан болсиму, бирақ дуня банкисиниң хитайға беридиған ярдәм пулини тохтатмайдиғанлиқини билдүрди.

Волфовитис сәйшәнбә күни бейҗиңдики һәптилик зияритини ахирлаштурушниң һарписида, дуня банкисиниң хитайға ярдәм пулини тохтатмаслиқ қарарини ақлап, дуня банкисиниң ярдәм пулиниң хитайдики нәччә милйон пуқраниң намратлиқтин қутулушиға ярдими болидиғанлиқини көрсәтти.

Бир қисим тәнқидчиләр буниң алдида, хитай нәччә милярд доллар пул хәҗләп, аләм учқучилиқ ишлирини елип баралиған йәрдә йәнә немә үчүн ярдәмгә муһтаҗ болидиғанлиқиға соал қойған. Волфовитисниң билдүрүшичә, хитай йәнила дунядики намратлар сани көп иккинчи дөләт болуп, дуня банкисиғиму қәрзи әң көп дөләт һесаблинидикән.

Волфовитис бу қетимқи сәпиридә хитайда ечилған тәрәққий қиливатқан дөләтләрниң бир йиғиниға қатнашқан һәмдә дуня банкисиниң гәнсу өлкисидики ярдәм программлирини көздин кәчүргән иди.

Илгири америкиниң муавин дөләт мудапиә минситирлиқ вәзиписини өтигән волфовитс шундақла йәнә, хитайниң һазирқи иқтисадий тәрәққиятни сақлап қелиш үчүн, пуқраларға көпрәк һоқуқ бериши керәкликини көрсәтти. У хәлқниң һоқуқи етирап қилинған, қанун билән башқурулған бир җәмийәтниң, иқтисадий тәрәққиятта интайин муһим рол ойнайдиғанлиқини тәкитлиди. (Арзу)