Дуня банкиси хитай һәққидики доклатиниң үчтин бир қисим мәзмунини чиқириветишкә мәҗбур болди


2007-08-17
Share

Чәтәл мәтбуатлири дуня банкиси йеқинда елан қилған хитайниң муһит әһвали һәққидики доклатиниң үчтин бир қисим мәзмунини хитай һөкүмитиниң бесими астида чиқириветишкә мәҗбур болғанлиқини хәвәр қилди. Доклатниң чиқириветилгән мәзмунида көрситилишичә, хитайда һәр йили һаваниң булғиниши сәвәбидин 650 миңдин 700 миңғичә адәм әҗилидин бурун өлмәктә.

Әнгилийә "пул - муамилә" гезитиниң бу һәқтики хәвиридә, дуня банкиси елан қилған "хитайниң муһит булғиниш әһвали" дегән доклатта, хитайда һәр йили һава вә суниң булғиниши кәлтүрүп чиқарған иқтисадий зиян 100 милярд долларға йетидиғанлиқини, бу хитайниң ички ишләпчиқириш омуми дарамитиниң 8.5 Пирсәнтини игиләйдиғанлиқини илгири сүргән. Доклатниң чиқириветилгән мәзмуни асаслиқи шәһәрләрниң һава булғиниш әһвалиға мунасивәтлик болуп, доклатта, хитайдики шәһәрләрниң өзидила һава булғиниш түпәйли әҗилидин бурун өлидиған адәмләр һәрйили 350 миңдин 400 миңғичә икәнлики, йәнә 300 миң кишиниң ишхана яки үсти йепиқ җамаәт сорунлиридики һава булғиниш сәвәбидин өлидиғанлиқини тәкитлигән. Буниңдин сирт доклатта йәнә, хитайда һәр йили 60 миң адәм су тәркибидики зәһәрлик маддилар сәвәбидин ашқазан раки, җигәр раки қатарлиқ һәр хил рак кесәлликлиридә өлидиғанлиқини язған.

" Пул - муамилә" гезитиниң хәвиридә, хитай һөкүмити дуня банкисиниң доклатидики бу мәзмунлар елан қилинса, хитайда иҗтимаий муқимсизлиқ яритишидин әнсирәп, дуня банкисини доклаттики бу мәзмунларни чиқириветишкә қистиған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт