Дуня уйғур қурултийи 8 дөләт йиғинидин кишилик һоқуқ мәсилисигә көңүл бөлүшни тәләп қилди

Дуня уйғур қурултийи "кишилик һоқуқсиз гүллиништин еғиз ачқили болмайду" дегән темида баянат елан қилип, санаәтләшкән 8 дөләт юқири дәриҗилик әмәлдарлири йиғинида хитайдики кишилик һоқуқ мәсилисиниңму чоқум оттуриға қоюлиши керәкликини тәкитлиди.

Баянатта мундақ дейилиду: "дуня уйғур қурултийи шуни үмид қилидуки, мәзкур йиғинда оттуриға қоюлидиған зөрүр мәсилиләр билән биргә кишилик һоқуқ мәсилисиму иқтисадий күч сүпитидә мәйданға келиватқан дөләтләр билән , болупму хитай билән елип берилидиған сөһбәтниң мәркизи темиси болуши керәк."

Баянатта йәнә, "өз хәлқиниң һәқ һоқуқлири вә әркинликигә һөрмәт қилмайдиған хитайдәк бир дөләт, кәскин дуняви мәсилиләрни һәл қилишта мәсулийәтчан болуп кетәлиши натайин. Буниңға бу нөвәтлик йиғин җаваб тапалайду" дейилгән.

Бу баянатта, униңдин башқа йәнә, дарфур мәсилисидиму хитайға бесим ишлитиш оттуриға қоюлған болуп, бу һәқтә мундақ дейилгән: "хитайниң бу йиғин мәйданиға келиши санаәтләшкән мәзкур дөләтләрни хитайни дарфурда вә өз елидә йүз бериватқан кишилик һоқуқ кризислирини һәл қилиш үчүн хитайдин ениқ бир вәдә елишта, уларни йәнә бир муһим пурсәт билән тәмин етиду."

Баянатниң ахирида, әгәр дуняниң бәзи җайлирида кишиләрниң әң әқәллий һоқуқлири тәһдит астида болидикән, ундақта пүткүл инсанийәтниң ортақ гүллиниши, вә бихәтәрликидин еғиз ечиш мумкин болмайдиғанлиқи оттуриға қоюлған.(Җүмә)