Dunya Uyghur qurultiyi 8 dölet yighinidin kishilik hoquq mesilisige köngül bölüshni telep qildi

Dunya Uyghur qurultiyi "kishilik hoquqsiz güllinishtin éghiz achqili bolmaydu" dégen témida bayanat élan qilip, sana'etleshken 8 dölet yuqiri derijilik emeldarliri yighinida xitaydiki kishilik hoquq mesilisiningmu choqum otturigha qoyulishi kéreklikini tekitlidi.

Bayanatta mundaq déyilidu: "dunya Uyghur qurultiyi shuni ümid qiliduki, mezkur yighinda otturigha qoyulidighan zörür mesililer bilen birge kishilik hoquq mesilisimu iqtisadiy küch süpitide meydan'gha kéliwatqan döletler bilen , bolupmu xitay bilen élip bérilidighan söhbetning merkizi témisi bolushi kérek."

Bayanatta yene, "öz xelqining heq hoquqliri we erkinlikige hörmet qilmaydighan xitaydek bir dölet, keskin dunyawi mesililerni hel qilishta mes'uliyetchan bolup kételishi natayin. Buninggha bu nöwetlik yighin jawab tapalaydu" déyilgen.

Bu bayanatta, uningdin bashqa yene, darfur mesilisidimu xitaygha bésim ishlitish otturigha qoyulghan bolup, bu heqte mundaq déyilgen: "xitayning bu yighin meydanigha kélishi sana'etleshken mezkur döletlerni xitayni darfurda we öz élide yüz bériwatqan kishilik hoquq krizislirini hel qilish üchün xitaydin éniq bir wede élishta, ularni yene bir muhim purset bilen temin étidu."

Bayanatning axirida, eger dunyaning bezi jaylirida kishilerning eng eqelliy hoquqliri tehdit astida bolidiken, undaqta pütkül insaniyetning ortaq güllinishi, we bixeterlikidin éghiz échish mumkin bolmaydighanliqi otturigha qoyulghan.(Jüme)