كوندىلىزا رايىس، قازاقىستان بىلەن ئېنېرگىيە ۋە بىخەتەرلىك مەسىلىلىرىنى مۇزاكىرە قىلدى


2005.08.23
Share on WhatsApp
Share on WhatsApp

ئامېرىكا تاشقىي ئىشلار مىنىستىرى كوندىلىزا رايىس، دۈشەنبە كۈنى ۋاشىنگتوندا ئامېرىكىنى زىيارەت قىلىۋاتقان قازاقىستان تاشقى ئىشلار مىنىستىرى قاسىم جۈمەرت توقايېۋ بىلەن سۆھبەت ئۆتكۈزۈپ، ئېنېرگىيە ۋە بىخەتەرلىك مەسىلىلىرىنى مۇزاكىرە قىلدى. توقايېۋ ئامېرىكىدىكى زىيارەت كۈنتەرتىپى بويىچە بۇ ھەپتە ئىچىدە ئامېرىكا دۆلەت مۇداپىئە مىنىستىرى ۋە ئاقسارايدىكى دائىرىلەر بىلەن ئۇچرىشىدۇ.

قازاقىستان شاڭخەي ھەمكارلىق گۇرۇھىدىكى رۇسىيە بىلەن خىتايدىن كېيىن تۇرىدىغان ئاساسلىق دۆلەتلەرنىڭ بىرى بولۇپ، مەزكۇر ئورگان بۇ يىل 7 - ئاينىڭ باشلىرى ئاستانادىكى باشلىقلار يىغىنىدا، ئامېرىكىدىن ئوتتۇرا ئاسىيادىكى قوشۇنلىرىنى ئېلىپ چىقىپ كېتىشنى تەلەپ قىلغان. ئەمما كوندىلىزا رايىس بىلەن توقايېۋنىڭ سۆھبىتى ھەربىي بازا مەسىلىگە چېتىلغان ياكى چېتىلمىغانلىقى مەلۇم ئەمەس.

ئامېرىكا تاشقى ئىشلار مىنىستىرلىقى باياناتچىسى مەككورماك سۆھبەتتىن ئىلگىرى مۇخبىرلارغا مەلۇمات بېرىپ، " ئۆز ئارا مۇناسىۋەتلەر شۇنداقلا بىخەتەرلىك ، ئېنېرگىيە، دېموكراتىك ئىسلاھات ۋە قازاقىستاندا بۇ يىل 12 - ئايدا ئېلىپ بېرىلىدىغان سايلامنى ئەركىن ۋە ئادىل ئېلىپ بېرىشنىڭ ئەھمىيىتى قاتارلىق ئىككى دۆلەت ئورتاق قىزىقىدىغان بىر يۈرۈش مەسىلىلەر كۆزدىن كەچۈرۈلىدۇ،" دەپ تەكىتلىگەن.

بۇ يىل 12 - ئايدا سايلام ئۆتكۈزۈش پرېزىدېنت نەزەربايېفنىڭ ئۆكتىچىلىرى تەرىپىدىن بىر غەلىبە، دەپ قارالماقتا. نەزەربايېفنى قوللىغۇچىلار سايلامنىڭ كېلەر يىلى 12 - ئايدا ئۆتكۈزۈلىشىنى تەلەپ قىلغان ئىدى. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت