Америка, сәуди вә хитай ширкәтлири бәш милярд долларлиқ енергийә келишими түзди


2007-03-30
Share

Франсийә агентлиқиниң 30 ‏- март бейҗиңдин бәргән хәвиридин мәлум болушичә, америкидики әң чоң нефит ширкити ексон мобил, сәуди әрәбистанниң арамко вә хитайниң хитай нефит химийә-санаити һәссидарлиқ чәклик ширкити җүмә күни хитайда нефит-химийә, нефит айриш завути вә 750 орунда мулазимәт понкитлирини қуруш үчүн омуми қиммити 5 милярд долларға йетидиған икки шерикчилик карханиси тохтими түзди.

Америка нефит ширкити ексон мобилниң билдүрүшичә, бу ширкәтниң бу нөвәт хитайға салған зор миқдардики мәблиғи 12 йиллиқ тәйярлиқниң нәтиҗиси икән.

Бу нефит айриш завути 2009-йилниң бешида ишқа кириштүрүлидикән. Бу түрниң бирси хитайниң фу җйән өлкисидә бурун бар болған хитай нефит химийә-санаити һәссидарлиқ чәклик ширкити билән фу җйән өлкиси арисидики нефит айриш завутини кеңәйтип қурушни оз ичигә алидикән.

Буниң билән бу завут сәуди әрәбистанниң хам нефитиниң күндилик айриш вә пишшиқлап ишләш миқдарини 3 һәссә көпәйтип 240 миң туңға йәткүзидикән.

Бу һәмкарлиқниң мәқсити, хитайниң нефит вә нефит-химийә мәһсулатлириға нисбәтән шиддәт билән өрләватқан еһтияҗини қамдаш болуп, йәнә сәуди әрәбистандин узун муддәтлик келидиған хам нефит келишиминиму өз ичигә алидикән. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт