Әнгилийә олимпик җәмийити өз тәнһәрикәтчилиригә олимпикта сияси мәсилиләрни оттуриға қоймаслиқ тәклипи бәргән

Сәйшәнбә күни, бейҗиң олимпик тәшикилләш комтети хадимлири дуняниң һәрқайси җайлиридин кәлгән тәнһәрикәтчиләрниң хәлқара олимпик комитетиниң олимпик җәрянида диний вә сияси һәрикәтләргә қатнашмаслиқ һәққидики қаидилиригә бойсунуши керәкликини билдүргән болсиму, әмма әнгилийә олимпик җәмийитиниң бу йиллиқ олимпиккә қатнишидиған тәнһәрикәтчиләрниң ағзини етишкә урунғанлиқиға қандақ қарайдиғанлиқи үстидә тохталмиған.

10- Феврал, йәкшәнбә күни, әнгилийә олимпик җәмийити оз тәнһәрикәтчилири хитайға барғанда сияси җәһәттә сәзгүр мәсилиләрни оттуриға қоймаслиқ тоғрисидики әһдинамигә қол қойдуруш тәклипини мәйданға чиқарғандин кийин, бу тәклип җиддий ғулғула қозғиған иди.

Бирләшмә агентлиқида бейҗиң олимпик тәшкилләш комитетиниң баянатчиси сүн вейдениң ейтқанлирини нәқил елип көрситишичә, сун вейде әнгилийә олимпик җәмийитиниң бу қарариға өз мәйданини ипадиләшни рәт қилған болсиму, әмма у бу нөвәт олимпиккә қатнишиш үчүн хитайға келидиған тәнһәрикәтчиләрниң олимпик роһиға һөрмәт қилишини вә хәлқара олимпик комтети бәлгилигән қаидиләргә һөрмәт қилишини үмид қилидиғанлиқини билдүргән.

Әнгилийә олимпик җәмийитиниң билдүрүшичә, улар һазир тәнһәрикәтчиләр әһдинамисини өзгәртиш үстидә музакирә елип бериватқан болуп, әмма буларниң бу әһдинамиси кишилик һоқуқ тәшкилатлириниң қаттиқ қаршилиқиға учриған иди.

Әмма әнгилийә олимпик җәмийити баянатчиси граһам невсон өзлириниң шундақ қарарға келишидә һәргизму хитай даирилириниң бесми түпәйлидин болмиғанлиқини тәкитлиди. (Җүмә)