Yaponiye hökümiti xitay hökümitining yaponiyidin epu sorishini telep qilmaqta

Yaponiye hökümet bayanatchisi, düshenbe küni tokyoda bergen bayanatida, "xitay hökümitining namayishlar tüpeyli yaponiyidin epu sorimighanliqi qattiq epsuslinarliq bir heriket. Lékin yaponiye yenila xitay hökümitining namayishlar sewebidin yaponiyidin epu sorishini we herqandaq shara'it astida zorawanliq heriketlerge yol qoyulmasliq toghrisidiki telipini tekitleydu", dédi

Xitay hökümiti april éyining bashliridin biri, her hepte axiri xitayning shangxey, béyjing we gwangju qatarliq chong sheherliride yaponiyige qarshi élip bériliwatqan namayishlarning özligidin yüz bériwatqanliqini bayan qilmaqta. Lékin nurghun kishiler, mezkur namayishlarning melum kishiler teripidin uyushturiliwatqanliqini bildürmekte.

Yaponiye metbu'ati bolsa, mezkur nayishlarning xitay hökümitining ruxsiti bilen teshkilliniwatqanliqini we hökümetning bu namayishlarni toxtitish üchün yiterlik tirishchanliq körsetmeywatqanliqini bildürmekte.

Ro'étiris agéntliqining bildürüshiche, gerche xitay hökümiti meqsetlik halda, namayishlargha ruxset qiliwatqanliqini inkar qilghan bolsimu, emma xalisa namayishlarni nahayiti asan toxtitalaydighanliqini körsetken. Dégendek, shangxeyde minglighan kishi yaponiyige qarshi namayish ötküzüp, shangxeydiki yaponiye konsulxanisi, yaponiye soda shirketliri we réstoranlirigha hujum qilghan bolsimu, ötken hepte minglighan kishi namayish ötküzüp, yaponiye bash elchixanisini tash- yamghurgha tutqan. Béyjingda bu hepte axiri héchqandaq namayish yüz bermigen. (Qanat)