Bush: her qandaq bir ümidlik jem'iyette din we metbu'at erkinliki bolushi kérek

Amérika prézidénti jorj bush seyshenbe küni aq saraydiki muxbirlarni kütüwélish yighinida xitay-amérika munasiwetliride alahide toxtilip, amérikining xitaygha eskertish bérish mejburiyitining barliqini tekitlidi hemde "her qandaq bir ümidlik jem'iyette iqtisadiy erkinliktin sirt yene, choqum din we metbu'at erkinlikimu bolushi kérek"dep bildürdi.

Yighinda bush yene teywen mesilisidimu toxtilip, nöwettiki ikki qirghaq jiddiy weziyitining, amérika choqum yüzlinidighan bir mesile ikenlikini eskertti, shundaqla ikki qirghaqni rayonning tinchliqini saqlap, mesilini tinch yolda bir terep qilishqa chaqirdi.

Bush yene, xitay- amérika munasiwetlirining intayin murekkep bolup, ularning hem dost hem riqabetchi ikenlikini, shundaqla xitayning dunya soda teshkilatigha kirishte qilghan wedilirige boysunup, barawer we adil ékisport usuli bilen dunya bazirigha yüzlinishi kéreklini tekitlidi.

Prézidént bush yene, xitayning dunya soda belgilimilirige boysunushini qolgha keltürüsh üchün, amérika hökümitining buningdin kéyin xitaygha yene dawamliq bésim ishlitidighanliqini bildürdi. (Peride)