Yawropa parlaménti xitaydin siyasiy mehbuslarni qoyup bérishni telep qildi
2008.01.18
Yawropa parlaméntidiki qanun tüzgüchiler peyshenbe küni qarar layihisi maqullap, xitay da'iriliridin öktichi zat xu jya we xitay türmisidiki siyasi mehbuslarni "derhal" qoyup bérishni telep qildi shundaqla béyjing olimpik yighinini bahane qilip, öktichi zatlar, muxbirlar we kishilik hoquqi pa'aliyetchilirini tutqun qilmasliqqa chaqirdi.
Kishilik hoquqi we eydiz pa'aliyetchisi xu jya 2007 - yili yawropa parlaméntining saxarow pikir erkinlik mukapatigha érishken bolup, xitay da'iriliri uni ötken ayning axirliri dölet bixeterlikige tehdit sélish jinayiti bilen qolgha alghan idi. Yawropa parlaménti qarar layihiside, "xitay da'iriliri xu jiyani derhal qoyup bérish kérek. Chünki u xalighanche qolgha élin'ghan, uning qolgha élinishi xu jyaning kishilik hoquq pa'aliyiti bilen munasiwetlik," dep körsetti. Qarar layihiside yene " kishilik hoquqqa bolghan diqqet- nezerni béyjing olimpik yighinigha merkezleshtürüsh kücheytilishi kérek," déyilgen .
Qarar layihisi awazgha qoyulushtin burun élip bérilghan yawropa parlaméntidiki munaziride, bezi ezalar yawropa parlaméntining eza döletlerge kishilik hoquq weziyiti yaxshilanmighiche béyjing olimpik yighinigha qatnishishni közdin kechürüshke tewsiye qilish pikirini otturigha qoydi. Yawropa parlaméntining gérmaniyilik ezasi tomas man " béyjing olimpik yighinigha 7 ay qalghan bolsimu, lékin xitay kishilik hoquqqa qanchilik hörmet qilidighanliqini körsetmekte," dep tekitligen. Xelq'ara teshkilatlar xitay da'irilirini olimpik yighini mezgilide kishilik hoquqni yaxshilash toghrisidiki wediside turmidi, dep eyiplimekte. (Erkin)
Munasiwetlik maqalilar
- En'giliye bash ministiri browin xitay we hindistan'gha qaratqan ziyaritini bashlidi
- Gollandiye tashqi ishlar ministirlikining béyjing olimpikini bayqut qilish yumulaq üstel yighinida Uyghur mesilisi diqqetni tartti
- Londondiki qeshqer kochisi heqqide paranglar
- Yawrupa sherqiy türkistan birliki teshkilatining 16 - nöwetlik saylimining netijisi
- Kishilik hoquq teshkilatliri xitayni metbu'atqa bolghan kontrolluqni bikar qilishqa chaqirdi
- Özbékistandiki kishilik hoquq depsendichilikliri, b d t da sürüshtürülmekte
- Xelq'ara kechürüm teshkilati xitayni emgek bilen özgertish tüzümini bikar qilishqa chaqirdi