Liy jawshing: xitay - yaponiye munasiwitining nacharliship kétishige koyzumi jawabkar

Xitay tashqi ishlar ministiri liy jawshing jüme küni ku'ala - lompurda yaponiye bash ministiri koyzumining yasikuno buzrukgahini ziyaret qilishi sewebidin yuqiri derijilikler söhbitining bikar qilin'ghanliqigha yaponiye bash ministiri jawabkar bolushi kérek, dédi. Liy jawshing, " bir dölet rehbiri buzrukgahni ziyaret qilip urush jinayetchilirige tawap qilsa bu qobul qilinmaydu " deydu.

Koyzumi bilen wén jyabaw kéler hepte ku'ala-lompurda sherqiy - jenubiy asiya döletler ittipaqining bashliqlar yighinigha qatnishidu. Esli yighin jeryanida yaponiye, jenubiy koriye we xitay rehberliri öz ara söhbet élip barmaqchi idi. Emma xitay hökümiti uchrishishning kéchiktürülgenlikini jakarlidi.

Koyzumi, xitay terepning eyibleshlirini ret qilip, " eger ular diplomatik kozur oynimaqchi bolsa bu kozurning waqti ötti " deydu. Yaponiye metbu'atliri xitayning yasikuno buzrukgahi mesilisige ésiliwélishini " bir bahane" dep qarimaqta.

Liy jawshing yighin jeryanida üch dölet tashqi ishlar ministirliri yighini ötküzüsh oyi yoqliqini bildürdi. U, yaponiyini ima qilip, "kishiler 2 - dunya urushidin kéyinmu kishilerge ziyankeshlik qilidighan ishlarni qiliwatidu" dep tekitligen. Xitayning yaponiye bilen zitlishish herikiti yaponiyining washin'gton bilen bolghan ittipaqini kücheymekte. (Erkin)