Америка дөләт мәҗлиси әзаси һенри һайд хитайни әйиплиди


2004-12-02
Share

Америка дөләт мәҗлиси авам палатасиниң хәлқара ишлар комитети рәиси һенри һайд (Henry Hyde) пәйшәнбә күни хитайни америкиниң шималий корийә вә ирандики ядро мәсилисини бир тәрәп қилиш тиришчанлиқлириға тосқунлуқ қиливатиду дәп әйиплиди.

Ройтерс ахбарат агентлиқиниң билдүрүшичә, һенри һайд сөзидә, "хитай һөкүмити шималий корийә ядро мәсилисидә йетәрлик тәсир күчини җари қилдуралмайватиду. Һәтта хитай америкиниң иран ядро мәсилисини бирләшкән дөләтләр тәшкилати бихәтәрлик кеңишидә бир тәрәп қилиш тәклибигиму тосқунлуқ қилди" дәп билдүргән.

Һенри һайд сөзидә йәнә, хитай һөкүмитиниң америкиниң тиришчанлиқлириға тосқунлуқ қилиштин сирт, хәтәрлик һакимийәтләрни риғбәтләндүрүп, уларниң әҗәллик қоралларни ишләпчиқиришиға ярдәм қиливатқанлиқини әйиплиди.

Хитай ташқи ишлар министирлиқиниң хоңкоңдики ишханиси пәйшәнбә күни һенри һайдниң сөзлиригә рәддийә берип, униң сөзлирини "хитайниң ташқи ишлар сиясити вә җәмийәт системисиға қилинған бир ғәрәзлик һуҗу" дәп көрсәтти.

Хитай ташқи ишлар министирлиқиниң баянатида йәнә, " һенри һайдниң сөзлири пүтүнләй мәсулийәтсизлик һәмдә икки дөләт рәһбәрлириниң йеқинда қолға кәлтүргән икки дөләт мунасивитини тәрәққий қилдуруш тиришчанлиқлириға тамамән қарши болди. Шундақла бу йәнә, икки дөләт мунасивитиниң сағлам тәрәққий қилишиға зиянлиқтур" дәп көрситилгән.

Һенри һайд сөзидә йәнә, хитай һөкүмитиниң теһранда тәсир даирисини күчәйтиш үчүн америкиниң иран ядро мәсилисини б д т бихәтәрлик кеңишидә бир тәрәп қилиш тәклибигә тосқунлуқ қилип, бу мәсилини техиму мурәккәпләштүривәткәнликини әйиплиди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт