Amérika dölet mejlisi ezasi hénri hayd xitayni eyiplidi

Amérika dölet mejlisi awam palatasining xelq'ara ishlar komitéti re'isi hénri hayd (Henry Hyde) peyshenbe küni xitayni amérikining shimaliy koriye we irandiki yadro mesilisini bir terep qilish tirishchanliqlirigha tosqunluq qiliwatidu dep eyiplidi.

Roytérs axbarat agéntliqining bildürüshiche, hénri hayd sözide, "xitay hökümiti shimaliy koriye yadro mesiliside yéterlik tesir küchini jari qilduralmaywatidu. Hetta xitay amérikining iran yadro mesilisini birleshken döletler teshkilati bixeterlik kéngishide bir terep qilish teklibigimu tosqunluq qildi" dep bildürgen.

Hénri hayd sözide yene, xitay hökümitining amérikining tirishchanliqlirigha tosqunluq qilishtin sirt, xeterlik hakimiyetlerni righbetlendürüp, ularning ejellik qorallarni ishlepchiqirishigha yardem qiliwatqanliqini eyiplidi.

Xitay tashqi ishlar ministirliqining xongkongdiki ishxanisi peyshenbe küni hénri haydning sözlirige reddiye bérip, uning sözlirini "xitayning tashqi ishlar siyasiti we jem'iyet sistémisigha qilin'ghan bir gherezlik huju" dep körsetti.

Xitay tashqi ishlar ministirliqining bayanatida yene, " hénri haydning sözliri pütünley mes'uliyetsizlik hemde ikki dölet rehberlirining yéqinda qolgha keltürgen ikki dölet munasiwitini tereqqiy qildurush tirishchanliqlirigha tamamen qarshi boldi. Shundaqla bu yene, ikki dölet munasiwitining saghlam tereqqiy qilishigha ziyanliqtur" dep körsitilgen.

Hénri hayd sözide yene, xitay hökümitining téhranda tesir da'irisini kücheytish üchün amérikining iran yadro mesilisini b d t bixeterlik kéngishide bir terep qilish teklibige tosqunluq qilip, bu mesilini téximu murekkepleshtüriwetkenlikini eyiplidi. (Peride)