Xu jintawning sözini bölgen falun'gongchi ayal sotqa chiqti

Xitay re'isi xu jintawning aq saraydiki kütiwélish murasimida qilghan sözini bölgen falun'gongchi ayal charshenbe küni washin'gtonda sotqa tartildi. Bu arida sot sirtida uning qollighuchiliri namayish ötküzüp, sotning uning üstidiki eyibleshni bikar qilishini telep qildi.

47 Yashliq doxtur ayal wang wénji 20‏- april küni aq saray hoylisida xu jintaw sözini bashlishi bilen uning gépini bölüp yuqiri awazda naraziliq bildürgen idi. Shu sewebtin sotta uninggha " bir chet'el emeldari bolush salahiyiti bilen öz mejburiyitini ada qiliwatqan xitay prézidénti xu jintawgha wehime salghan we awarichiliq tughdurghan" dégen eyiblesh chüshken.

Eger bu eyibleshler turghuzulsa, u halda wang wénji 5000 amérika dolliri jerimane töleshke hemde 6 ay türmide yétishqa höküm qilinidiken. Bu ayal üstidiki sot 18‏- may küni yene dawam qilmaqchi. Sot sirtida namayish qiliwatqan 30 nechche kishi " wang wénji jinayetchi emes" dep towlashti hemde eslide sabiq xitay re'isi jyang zéminning sotqa tartilishi kéreklikini körsetti.

Falun'gong muriti bolghan wang wénji xu jintaw söz qiliwatqanda xitayche, " falun'gongni basturushni toxtat", " séning waqting toshup qaldi" , " séning qilghanliringning hemmisi mushu hayatingda yene özengge qaytidu" dep towlighan. Nöwette chet'ellerdiki bir qisim démokratchilar bu ayalni " qehriman" dep süpetlimekte.(Peride)