Xitay falun'gungni junggo ‏- amérika munasiwitige buzghunchiliq qilish bilen eyiblidi

Xitay hökümiti seyshenbe küni falun'gung teriqitini " junggogha qarshi siyasiy guruh" dep eyiblidi. Xitay tashqiy ishlar ministirliqi xitay dölet re'isi xu jintawning aq saraydiki kütiwélish murasimida falun'gung muriti teripidin naraziliqqa uchrighanliqi munasiwiti bilen amérikini eyibleshtin özini qachurdi, lékin hujum nishanini falun'gunggha qaratti.

Xitay dölet re'isi xu jintawning 20 - aprilda prézidént bush bilen uchrishish weqesi her ikki dölet üchün tarixiy ehmiyetke ige, dep qaralghan. Lékin xu jintaw aq saraydiki kütiwélish murasimida tebrik sözi qiliwatqanda muxbirlar qoshunidiki bir falun'gung muriti uninggha naraziliq bildürdi. Xitay tashqiy ishlarministirliqi bayanatchisi chin gangning eskertishiche, xitay weqege bolghan pikirini amérika terepke yetküzgen. U, " bu weqe falun'gung teriqitining bir xurapi guruh bolupla qalmay, junggogha qarshi siyasiy meqsedlik teshkilat ikenlikini ashkarilidi " deydu. Chin gang falun'gungni junggo - amérika munasiwitige buzghunchiliq qilish bilen eyibligen we amérika da'iriliridin uninggha qarshi tedbir élishni telep qilghan.

Lékin falun'gung teriqitining xongkongdiki bayanatchisi sha runshüy, xitay tashqiy ishlar ministirliqining eyiblishini ret qildi. U, " méningche falun'gungning bir meniwiy heriket ikenlikini, yaxshi tiptiki beden meshiqi we héchkimning salametliki hem tepekkürige tehdit salmaydighanliqini pütün dunya bilidu " deydu. U, falun'gungning xitaygha qarshi heriket ikenlikini ret qildi. (Erkin)