Ху җинтав шредөр вә маркиллар билән сөһбәт өткүзди

Германийидики зиярити җәрянида уйғурлар, тибәтләр вә фалунгуң муритлириниң наразилиқ һәрикитигә дуч кәлгән хитай дөләт рәиси ху җинтав, җүмә күни германийиниң болғуси баш министири абгела маркил вә баш министир герхард шредөрлар билән айрим - айрим көрүшүп, хитай - германийә сияси вә сода мунасивәтлирини давамлиқ илгири сүрүшкә қошулди.

Әмма германийә әмәлдарлириниң ашкарилишичә, ангела маркил сөһбәт җәрянида ху җинтавға " қанунниң роли" вә хитайда " әркинликни илгири сүрүш" ниң әһмийитини алаһидә тәкитлигән.

Бирләшмә ахбарат агентлиқи, исмини ашкарилашни халимайдиған германийә әмәлдарлиридин ангела маркилниң мәсилини " өзини тутувалған һалда, әмма чүшүнишлик қилип" оттуриға қойғанлиқини игиллигән.

Ангела маркил, хитай иқтисадиниң тәрәққиятини махташ билән биргә, хитайниң барғанчә бир рәқибкә айлинип қеливатқанлиқидин әндишә қиливатқанлиқини тилға алған. Ху җинтав билән маркил, явропа иттипақиниң хитайға қойған қорал - ярақ имбаргоси һәққидә тохталмиди. Әмма ху җинтав герхард шредөр билән учрашқанда шредөр имбаргони бикар қилишни қоллиған.

Шу күни германийә баш министир бинасиниң алдида ху җинтавға қарши намайиш өткүзгән уйғурлардин бир түркүм кишиләр, германийә сақчилири тәрипидин тутуп китилип 2 саәттин кейин қоюп берилди. (Әркин)