Gérmaniyidiki teshkilatlar, shrédörni xitay bilen kishilik hoquq mesilisi boyiche söhbet élip bérishqa ündidi

Uyghur, tibet , falun'gong we xitay démokratlirigha wekillik qilidighan gérmaniyidiki teshkilatlar, gérmaniye bash ministiri gérxard shrédörning xitayni ziyaret qiliwatqanliqi, shundaqla dunya kishilik hoquq küni munasiwiti bilen bérlinda axbarat élan qilish yighini ötküzüp , shrédörni xitay bilen kishilik hoquq mesilisi boyiche söhbet élip bérishqa ündidi.

Seyshenbe küni ötküzülgen axbarat élan qilish yighini, gérmaniyidiki xelq'ara kishilik hoquq teshkilati teripidin uyushturulghan. Yighin'gha gérmaniyidiki tibetler, xitay démokratlar we falun'gongchilar bilen birge, merkizi myunxéndiki yawropa sherqiy türkistan ittipaqining mu'awin re'isi perhad muhemmidi , bash katip ümid agahi qatarliq kishiler ishtirak qilghan.

Yighinda ümid agahi, "sherqiy türkistan iqtisadining ehwali we Uyghurlarda hashar" dégen témida söz qilip, Uyghur déhqanlarning ékispilatatsiyige uchrawatqanliqini, sherqiy türkistandiki siyasi mehbuslargha qaritilghan ölüm jazaliri heqqide toxtalghan.

Yighinda her qaysi teshkilatlar, xitayni ziyaret qiliwatqan gérxard shrédörning, xitay hökümiti bilen bolghan munasiwetlerde kishilik hoquq mesilisini otturigha qoyup, bu sahede ilgirilesh hasil qilish üchün béyjing da'irilirige bésim ishlitishni telep qilghan.

Shrédörning xitaydiki ziyariti düshenbe küni bashlan'ghan . U, seyshenbe küni xu jintaw bilen söhbet ötküzgen, shundaqla shu küni soda sahesidiki erbaplargha söz qilghan. (Erkin)