Dik chénéy: xitayning sözi bilen herikiti birdek emes


2007.02.23
Share on WhatsApp
Share on WhatsApp

Amérikining mu'awin prézidénti dik chénéy, jüme küni awstiraliyining sédniy shehiride tingshighuchilargha söz qilip, xitayning sözi bilen herikiti birdek emes, dep agahlandurdi.

Dik chénéy, yaponiye we gu'am arilida élip barghan sepiridin kéyin , peyshenbe küni awstiraliyini ziyaret qilip, jüme küni sédniydiki awstiraliye - amérika rehberlik söhbiti, dep atlidighan bir xususi organda söz qildi. U, xitayning herbiy tereqqiyat qurulushini tézlitish pilani shundaqla ötken ayda élip barghan sün'iy hemragha qarshi bashqurulidighan bomba siniqi, uning tinchliq bilen bash kötürüsh, deydighan prinsipigha zit, dep körsetti.

Chénéy sözide xitayning shimaliy koriye bilen yadro qorallar kélishimi imzalinishta oynighan rolini maxtighan bolsimu, lékin xitayning herbiy tereqqiyat sür'iti heqqide tereplerni agahlandurdi. Chénéy yaponiyini ziyaret qilghanda yaponiye bash ministiri shinzo abéy bilen xitayning herbiy tereqqiyat mesilisini muzakire qilghan. Yaponiye xitayning herbiy tereqqiyat qurulushidin eng köp endishe qiliwatqan döletlerning biri bolup hésablinidu.

Dik chénéy sédnéydiki yighinda "ötken ayda élip bérilghan sün'iy hemrahqa qarshi turush siniqi we xitayning herbiy qurulush tereqqiyatini dawamliq tézlitish pa'aliyiti ijabiy heriket emes shundaqla bu xitayning tinchliq bilen bash kötürüsh pilanigha uyghun kelmeydu " dep tekitligen.

U, xitayning yer sharida xeterlik téxnikilarning tarqilip kétishini cheklesh sépige qatnishishini ümid qildi. Xitay, iran, shimaliy koriye, pakistan, süriye qatarliq döletlerge qirghinchiliq xaraktirlik qorallar téxnikisini éksport qilish bilen eyibliniwatqan döletlerning biri. Xitay da'iriliri 11 - yanwarda élip barghan sün'iy hemragha qarshi bashqurulidighan bomba siniqini pen - tetqiqat meqsitide élip bérildi, dep aqlighan bolsimu, lékin bu sinaq amérika we uning ittipaqdashlirini endishige salmaqta. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet