Gollandiye parlaméntidiki xristi'anlar birleshmisi olimpikni bayqut qilish pikirini otturigha qoydi

18- Féwral düshenbe küni, gollandiyide hakimiyet béshidiki birleshme partiyiler ichidiki bir partiye, xitaydiki kishlik hoquq mesilisini küchlük rewishte ipade qilish üchün, bu yil awghustta béyjingda ötküzilidighan olimpik yighinining échilish murasimigha qatnishishni bayqut qilish pikirini otturigha qoydi.

Roytérsta körsitilishiche, gollandiye parlaméntidiki xristi'anlar birleshmisining wekili jo'él wurdéwind özlirining, hökümetni olimpik échilish murasimini bayqut qilishqa qattiq qistawatqanliqini hemde bu jehette xelq'ara jem'iyetning yardimini izdewatqanliqini bildürgen.

U yene, hazir xitaydiki künsayin nacharliship bériwatqan kishilik hoquq xatirisi we xitayning sudandiki siyasiti tüpeyli bu nöwetlik olimpikni bayqut qilish üchün, özining hazir yawropadiki siyasiy partiyiler we amérikidiki libéral partiyiler bilen birliship heriket élip bérishqa tirishchanliq körsitiwatqanliqini ashkarilighan.

Hazir xitayning olimpik yighini, kishilik hoquq we sudan siyasiti tüpeyli dunyaning her qaysi jaylirida oxshash bolmighan inkaslar meydan'gha chiqishqa bashlighan bolup, aldinqi hepte 2008- yilliq béyjing olimpik yighinining bedi'iy meslihetchilik wezipisini üstige alghan dangliq kino rézhissori stéwin spi'elberg ependi, xitayning sudan'gha qaratqan siyasiti seweblik mezkur wezipisidin istipa bergen idi. Uningdin bashqa, sekkiz neper nobil tinchliq mukapati sahibi xitay re'isi xu jintawgha mektup yollap xitay hökümitini xitayni sudan siyasitini özgertishke chaqirghan idi. (Jüme)