Пакистан пидаилири гөрүгә алған хитай пуқралирини қоюп беришни рәт қилди

Икки нәпәр хитай пуқрасини гөрүгә алған пакистан мусулман пидаилири чаршәнбә күни қәбилә башлиқлириниң бу икки кишини қоюп бериш тәливини рәт қилди.

Америка бирләшмә ахбарат агентлиқиниң хәвәр қилишичә, пидаилар рәһбири абдулла мәхсут қәбилә башлиқлири билән елип барған сөһбитидә, мусулман пидаилири, гөрүгә елинғучилар билән биргә қоршавға елинған җайдин сақ-саламәт айрилишқа капаләтлик қилишни, болмиса бу икки кишини қоюп бериш һәққидә сөһбәтлишишни рәт қилидиғанлиқини билдүрди.

Абдулла мәхсут йәнә, "әгәр һөкүмәт бизниң тәливимизгә қошулмиса, бизниң пидаилиримиз өзини өлтүрүвелиш характерлик һуҗум қилиду. Әгәр һөкүмәт бизгә һуҗум қилишни ойлайдикән, у чағда улар өзлирини вәйран қилған болиду" деди.

Пакистанниң афғанистан билән чегралинидиған җайидики қәбилә башлиқлириниң абдулла мәхсут билән өткүзгән сөһбити нәтиҗисиз аяқлашқандин кейин, улар һөкүмәтниң мусулман пидаилириға қораллиқ һуҗум қилишини қоллайдиғанлиқини билдүрди. Лекин пакистан һөкүмити техи қорал күчи ишлитишни қарар қилмиди.

Бу арида, хитай яшлар гезитидә пакистан презденти пәрвәз мушәррәфниң бу вәқәгә үмид билән қарайдиғанлиқи, һәмдә бу ишниң бир- икки күн ичидә һәл болидиғанлиқи тоғрисида хәвәр елан қилинди. Әмма хәвәрдә бу пәрәзниң қайси мәнбәдин пайдиланғанлиқи тоғрисида ениқ бир немә дийилмиди. (Пәридә)