Америкиниң әң алий сот мәһкимиси гуәнтанамо һәрбий сотини "қанунсиз" дәп һөкүм чиқарди

Франсийә агентлиқиниң хәвәр қилишичә, 6 ‏- айниң 29 ‏- күни америкиниң әң алий сот мәһкимиси америка һөкүмитиниң гуәнтанамо дики деңиз армийә һәрбий лагирида тәсис қилинған террорчилиққа қарши уруш һәрбий сотини "қанунсиз" дәп һөкүм чиқарди. Һүкүмнамидә "гуәнтанамо һәрбий сотиниң рәсмийәтлири вена әһдинамисиниң урушта әсир елинғанларға қилинидиған муамилә җәһәттики бәлгилимиригә хилап" дейилгән. Шундақла йәнә, америка президенти җорҗи бушниң бундақ һәрбий сотни тәсис қилғанлиқини "өзиниң һоқуқи даирисидин чәтнигәнлик" дейилгән. Ақ сарай һазир буниңға җаваб бериш алдида турмақта.

Хәвәрдә баян қилинишичә, ақ сарайниң пишиқәдәм хадими "бу җәһәттики бәлгилимиләр мурәккәп, қанун мәслиһәтчилири буни көзитиватиду" дәп чүшәндүргән. Америка президенти җорҗи буш болса, өзи бу ишни дөләт мәҗлисиниң мәслиһәтигә қоймай, бәлки 11 ‏- сентәбир вәқәсидин бир һәптә өткәндә президентқа "зөрүр тепилғанда һәр қандақ җиддий һәрикәт қоллинишқа болиду" дәп берилгән пәвқуладдә һоқуққа асасән иш көргәнликини баян қилмақта. (Вәли)