Xitay amérikidin gu'antanamodiki Uyghurlarni qayturup bérishni yene telep qildi

Xitay tashqiy ishlarministirliqi bayanatchisi chin gang peyshenbe küni xitayning amérikidin güentanamodiki Uyghurlarni qayturup bérishni telep qilghanliqini bildürdi.

Chin gang bu sözlerni tashqiy ishlarministirliqining axbarat élan qilish yighinida prézidént bushning amérika merkizi axbarat idarisining chet'eldiki mexpiy türmilirige da'ir sözige baha bergende tekitligen. U, " junggo xelq'ara jem'iyetning amérika merkizi axbarat idarisi qurghan mexpiy türmilerdin endishe qiliwatqanliqini xatirilep qoydi " deydu.

Prézidént bush charshenbe küni amérika merkiz axbarat idarisining chet'elde mexpiy turme qurghanliqini tunji qétim étirap qildi. Bushning eskertishiche, 14 neper yuqiri derijilik gumanliq térrorchi merkizi axbarat idarisining bu mexpiy türmiliridin güentanamogha yötkep kélin'gen. Amérika herbiy da'iriliri ularning kéler yili sotlinidighanliqini bildürmekte.

Xitay hökümiti güentanamodiki Uyghurlarni qayturuwélishqa uruniwatqan bolsimu, lékin amérika Uyghur tutqunlarning xitayda ten jazasigha uchraydighanliqini eskertip, xitayning telipini ret qilghan. Amérika hökümiti bu Uyghurlarni "xata yerde xata waqitta turup qalghan" kishiler, dep jakarlidi. Bu xitay da'irilirining güentanamodiki Uyghurlarni qayturup bérish toghrisida tunji qétim bayanat élan qilishi emes. (Erkin)