Америка гуәнтанамо мәсилисидә җәнвә келишимигә риайә қилиду


2006-07-11
Share

Америка һөкүмити сәйшәнбә күни гуәнтанамо һәрбий түрмисидә һәмдә дуняниң һәр қайси җайлиридики америка һәрбий қисимлири тәрипидин тутуп турулуватқан барлиқ мәһбусларға җәнвә келишимигә асасән муамилә қилидиғанлиқини билдүрди.

Ақсарайниң баянатчиси тони сно, америка алий сотиниң йеқинда президент бушниң гуәнтанамодики мәһбусларни сотлаш үчүн қурған һәрбий соти тоғрисида чиқарған қарари, америка мудапиә министирлиқиниң бу җәһәттики сияситини өзгәртип, йеңи бир сиясәт бәлгилишигә сәвәб болди, деди.

Америка алий соти йеқинда, президент буш тәрипидин террор гумандарлирини сотлаш үчүн қурулған һәрбий сотни, қанунсиз дәп җакарлап, президент бушниң бундақ сот қуруш салаһийити йоқ икәнлики тоғрисида һөкүм чиқарған. Алий сот бу тоғридики қарарида шундақла гуәнтанамодики мәһбусларға җәнвә келишиминиң рамкиси ичидә муамилә қилиниши керәкликини тәкитлигән иди.

Хәлқара кишилик һоқуқ тәшкилатлири, ғәрб дөләтлири вә америкидики демократик партийә рәһбәрлири, алий сотниң бу қарарини қизғин қарши елип, алий сотниң бу қарари, америкиниң хәлқарада кишилик һоқуқ вә демократийә мәсилисидә хунүклишишкә башлиған образини қайтидин ақлиди дәп көрсәткән.

Сәйшәнбә күни америка мудапиә министирлиқи бир оқтуруш чүшүрүп, гуәнтанамодики мәһбуслар вә дуняниң һәр қайси җайлирида америка һәрбий қисимлири тәрипидин тутуп турулуватқан мәһбусларға җәнвә келишими бойичә муамилә қилинидиғанлиқини билдүрди.

Америка һөкүмити һазирғичә, гуәнтанамо вә башқа америка һәрбий түрмилиридә тутуп турулуватқан мәһбусларни уруш әсирлири дәп етирап қилмиған иди. Мудапиә министирлиқиниң бу йеңи оқтуруши америка һөкүмитиниң бу мәсилсидики позитисйисиниң өзгиридиғанлиқини көрсәтмәктә. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт