Amérika gu'entanamo mesiliside jenwe kélishimige ri'aye qilidu


2006.07.11
Share on WhatsApp
Share on WhatsApp

Amérika hökümiti seyshenbe küni gu'entanamo herbiy türmiside hemde dunyaning her qaysi jayliridiki amérika herbiy qisimliri teripidin tutup turuluwatqan barliq mehbuslargha jenwe kélishimige asasen mu'amile qilidighanliqini bildürdi.

Aqsarayning bayanatchisi toni sno, amérika aliy sotining yéqinda prézidént bushning gu'entanamodiki mehbuslarni sotlash üchün qurghan herbiy soti toghrisida chiqarghan qarari, amérika mudapi'e ministirliqining bu jehettiki siyasitini özgertip, yéngi bir siyaset belgilishige seweb boldi, dédi.

Amérika aliy soti yéqinda, prézidént bush teripidin térror gumandarlirini sotlash üchün qurulghan herbiy sotni, qanunsiz dep jakarlap, prézidént bushning bundaq sot qurush salahiyiti yoq ikenliki toghrisida höküm chiqarghan. Aliy sot bu toghridiki qararida shundaqla gu'entanamodiki mehbuslargha jenwe kélishimining ramkisi ichide mu'amile qilinishi kéreklikini tekitligen idi.

Xelq'ara kishilik hoquq teshkilatliri, gherb döletliri we amérikidiki démokratik partiye rehberliri, aliy sotning bu qararini qizghin qarshi élip, aliy sotning bu qarari, amérikining xelq'arada kishilik hoquq we démokratiye mesiliside xunüklishishke bashlighan obrazini qaytidin aqlidi dep körsetken.

Seyshenbe küni amérika mudapi'e ministirliqi bir oqturush chüshürüp, gu'entanamodiki mehbuslar we dunyaning her qaysi jaylirida amérika herbiy qisimliri teripidin tutup turuluwatqan mehbuslargha jenwe kélishimi boyiche mu'amile qilinidighanliqini bildürdi.

Amérika hökümiti hazirghiche, gu'entanamo we bashqa amérika herbiy türmiliride tutup turuluwatqan mehbuslarni urush esirliri dep étirap qilmighan idi. Mudapi'e ministirliqining bu yéngi oqturushi amérika hökümitining bu mesilsidiki pozitisyisining özgiridighanliqini körsetmekte. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet