Amérika dölet mejliside xitaydiki kishilik hoquq we intérnét témisida guwahliq bérish yighini ötküzüldi

1-Féwral küni amérika dölet mejliside, amérika dölet mejlisi ezasi Tim Ryan ning teshebbusi bilen xitaydiki kishilik hoquq we intérnét namidiki guwahliq bérish yighini ötküzüldi. Yighin amérika dölet mejlisi kishilik hoquq guruppisi teripidin orunlashturulghan bolup, dölet mejlisi ezasi tom lentos yighinning échilish nutiqida amérikidiki eng chong intérnét shirketlirining xitay hökümitining démokratiye we kishilik hoquqini depsende qilidighan qilmishlirigha shérik boluwatqanliqini eyiblidi.

Bu yighin dunyadiki eng chong izdesh tor béti bolghan Google ning xitayche nusxisi resmiy ishqa chüshüp uzun ötmeyla échilghan bolup, amérikidiki Google, Yahoo, Microsoft, Cisco qatarliq xitay bilen soda qiliwatqan chong intérnét shirketliri bu yighin'gha teklip qilin'ghan bolsimu, wekil ewetmigen.

Yighinda guwahliqtin ötken mutexessislerning bildürüshiche, izdesh tori bolghan Google, Yahoo qatarliqlarning xitayche nusxisida xitay kompartiyisi "xeterlik" dep qarighan "démokratiye", "kishilik hoquq" qatarliq 1000 din artuq söz süzüwélitgen bolup, bu sözler izdesh üchün kirgüzülgende, xitay kompartiyisige "tehdit" bolmighan memunlar tépilidiken. Ularning bildürüshiche, xitayda 30 mingdin artuq intérnét saqchisi milyonlighan intérnét ishletküchilirining intérnéttiki herikitini nazaret qilidiken.

Yighinda xitay-amérika iqtisadiy we bixeterlikni közitish komitéti, chégrisiz muxbirlar teshkilati, xelq'ara kechürüm teshkilati, kishilik hoquqni közitish teshkilati, toronto uniwérsitéti qatarliq orunlardin kelgen wekiller guwahliqtin ötti. Ular amérika hökümitining xitay bilen soda qiliwatqan intérnét shirketlirining xitay hökümitige masliship démokratiye we kishilik hoquqni depsende qilishigha qarap turmasliqini, shirketlerning mezmunlarni süzeleydighan yumshaq détallarni xitay hökümitige sétishige yol qoymasliqini telep qilishti.