Xamas rehbiri xelq'arani pelestin'ge qiliwatqan yardemni toxtatmasliqqa chaqirdi

Ottura sherq mesilisidiki 4 terep wekilliri düshenbe küni londonda yighin échiwatqan mezgilde, xamas teshkilatining aliy rehbiri pelestin'ge iqtisadiy yardem qiliwatqan döletlerning, xamasning parlamént saylimida utup chiqqanliqi sewebidin pelestin'ge qilidighan yardemni toxtitip qoymasliqini telep qildi.

Xamas rehbiri ismayil xaniyah düshenbe küni ghezzidiki muxbirlarni kütiwélish yighinida bu chaqiriqni qilghan bolup, u amérika, rusiye, yawropa ittipaqi we birleshken döletler teshkilati qatarliq ottura sherq tinchliq programmisini ijra qiliwatqan 4 terepni, pelestin xelqining éhtiyajini nezerde tutup, iqtisadiy yardemni dawamliq bérishke chaqirdi.

Ismayil xaniyah sözide yene, iqtisadiy yardemning pelestinning muqimliqigha paydiliq boludighanliqini, undaq bolmighanda, pelestin hökümitidiki 140 mingdin oshuq memuriy emeldarlarning ma'ashini bérishmu teske chüshidighanliqini tekitlidi.

Amérika tashqi ishlar ministiri kondoliza rays londondiki yighin'gha méngishtin burun, eger xamas rehberlikidiki pelestin hökümiti zorawanliq qilishni toxtatmisa hemde isra'iliyining mewjutluqini étirap qilmisa, amérikining pelestin'ge qaratqan iqtisadiy yardemni toxtitidighanliqini éytti.

Xamas rehbiri ismayil xaniyah " biz xamaslar bu mesilide söhbetlishishke teyyarmiz hemde yardem pullirining silerning nazaret qilishinglar astida ishlitilidighanliqigha wede bérimiz" dédi. (Peride)