Xamas gherb ellirining isra'iliyini yoqitish niyitidin waz kéchish telipini ret qildi

Ötken heptidiki parlamént saylimida ghelibe qilghan pelestin radikal islam herikiti xamas seyshenbe küni bayanat élan qilip, pelestin aptonomiyisining siyasi hoquqini qolgha keltürgen bolsimu, emma isra'iliyige qarshi " tirkishish" istratégiyisidin waz kechmeydighanliqini jakarlidi.

Yawropa ittipaqi, amérika, rusiye we b d t qatarliq dölet we xelq'ara teshkilatlar düshenbe küni bayanat élan qilip, xamasni zorawanliqtin waz kéchishke, isra'iliyini étirap qilishqa chaqirghan. Eger bu shertlerge könmise, pelestin'ge bérilidighan yardemni toxtitidighanliqini agahlandurdi. Pelestin'ge bérilidighan yardemning asasi qisimini yawropa ittipaqi, amérika we se'udi erebistanlar üstige alghan. Yawropa ittipaqi 2005 - yili pelestin'ge 600 milyon dollar, amérika 400 milyon dollar yardem qildi. Biraq xamas herikitining rehberliridin ismayil xaniye, bu teklipni " adaletlik shertler emes", dep atidi. U, " adaletsiz shertler" pelestin xelqining bixeterlikige xewp yetküzidu, dep tekitligen.

Isra'iliye da'irilirining agahlandurushiche, tél'awif pelestin da'irilirige béridighan baj kirimini tonglitip qoyushni oylashmaqta. Yawropa ittipaqi bilen amérikining oltumatumi xamas herikitining rehberlirini ghezeplendürgen. Xamas herikitining rehbiri xalid méshal, en'giliye " közetküchiler " gézitige yazghan maqaliside " xamasning para bérish, aldash we heywe qilishqa qarshi turush küchi bar " deydu. Emma b d t bash katipi kofi annan düshenbe küni amérika, yawropa ittipaqi we rusiyiler bilen birge élan qilghan töt terep bayanatida, " kélechektiki pelestin hökümitining barliq ezaliri zorawanliqtin waz kéchishi, isra'iliyini étirap qilishi we yol xeritisini öz ichige alghan ilgiriki kélishim we mejburiyetlirini étirap qilshi kérek " dédi.