Русийә даирилири хамасни москваға тәклип қилди

• 
  2006-02-09

Русийә президенти владимир путин, йеқинда пәләстиндә өткүзүлгән парламинт сайлимида ғәлибә қилған хамас һәрикитиниң рәһбәрлирини москваға тәклип қилди. Путин русийиниң ғәрб дөләтлириниң әксичә, хамас һәрикитини исраилийигә қаршиﮌ онлиған өзини өлтүривелиш характерлик һуҗум елип барған бир террорлуқ тәшкилат дәп қаримайдиғанлиқини билдрүди.

Америка бирләшмә агентлиқиниң хәвәр қилишичә, хамас һәрикитиниң рәһбәрлири президент путинниң тәклипини дәрһал қобул қилған.

Испанийини зиярәт қиливатқан русийә президенти путин, испанийә баш минстири запатиро билән бирликтә өткүзгән мухбирларни күтивелиш йеғинидин кейин бәргән баянатида, хамас һәрикити демократик вә қанунлуқ бир сайлам нәтиҗисидә һакимийәт бешиға кәлди. Биз пәләстин хәлқиниң ирадисигә һөрмәт қилишимиз керәк, дегән.

Хамас һәрикити 25‏- январ күни пәләстиндә елип берилған парламинт сайлимида ғәлибә қилип, дуня җамаәтчиликини һәйран қалдурған. Хамас һәрикитиниң низамнамисида, һәрикәтниң мәқсиди исраилийини йоқитиш дәп бекитилгән болуп, ғәрб дөләтлири узундин бери хамас һәрикитигә низамнамисидин мәзкур ибарини чиқирвитишни тәләп қилип кәлгән болсиму, әмма хамас һазирғичә бу тәләпләрни рәт қилип кәлмәктә.

Бу арида, франисйә агентлиқиниң хәвәр қилишичә, америка һөкүмити, русийә һөкүмитини президент путинниң хамас рәһбәрлирини москваға тәклип қилиш мәқсити һәққидә чүшәнчә беришкә чақирған. (Әқидә)